O‘zbekiston Markaziy banki 2020-yil uchun inflyatsiyaning bazaviy prognozini 12—13,5 foiz darajasida saqlab qolmoqda. Markaziy bank joriy yil yakuniga qadar inflyatsiya darajasi pasayishiga xizmat qiluvchi omillarni ma’lum qildi.
Unga ko‘ra, inflyatsiya darajasining pasayishi quyidagi prognoz baholariga asoslangan:
- 2019-yilda yuzaga kelgan ba’zi inflyatsion omillar ta’sirining tugab borayotganligi hamda oziq-ovqat va nooziq-ovqat tovarlarining aksariyati bo‘yicha narxlar Markaziy Osiyo mintaqasidagi, shuningdek, asosiy savdo hamkor davlatlardagi narxlar darajasiga moslashib bo‘lganligi;
- qishloq xo‘jaligi mahsulotlari, to‘qimachilik va qurilish sanoatida mahsulot ishlab chiqarish hajmi o‘sishi prognoz qilinmoqda va bu ichki iste’mol bozorida taklif hajmining ortishiga xizmat qiladi. Bunda raqobat muhitini bosqichma-bosqich yaxshilab borish muhim omil hisoblanadi;
- pul-kredit va makroprudensial siyosatning zarur dastaklaridan foydalanish hamda davlat xarajatlari va umumiy budjet taqchilligini optimallashtirish orqali kreditlarning maqbul darajada o‘sishi ta’minlanadi va shu orqali inflyatsiya va ayirboshlash kursiga bo‘lgan bosimni pasaytiradi.
- Qayd etilishicha, 2018—2019-yillarda o‘rtacha ish haqi darajasining sezilarli darajada to‘g‘rilanganligi hisobiga 2020-yilda aholi nominal daromadlarining mo‘tadil darajada o‘sishining kutilishi talab omillari ta’sirini kamaytirishga yordam beradi.
Izoh (0)