Majburiy ijro byurosi Toshkent viloyat boshqarmasi xodimlari tomonidan Bekobod shahrida o‘tkazilgan tezkor tadbirda Bekobod shahar Me’mor ko‘chasida joylashgan avtomobillarga gaz to‘ldirish shoxobchasida gaz hisoblash uskunasining ko‘rsatkichlarini o‘zgartirish maqsadida, hisoblagichga tashqi ta’sir ko‘rsatib foydalanganligi aniqlangan. Bu haqda “Daryo”ga Majburiy ijro byurosi tomonidan ma’lum qilindi.
Mazkur holat yuzasidan to‘plangan hujjatlar hamda rasmiylashtirilgan dalolatnomalarga ko‘ra, shu vaqtga qadar gaz hisoblagichga tashqi ta’sir oqibatida jami 1 478 400 kub metr tabiiy gaz o‘g‘irlanganligi aniqlangan.
Yuqoridagi holatda “Hududgaz Toshkent” MChJ mansabdor shaxslari mansab vakolatini suiiste’mol qilib, gaz hisoblash uskunasiga o‘rnatilgan parolni ushbu shoxobcha mansabdor shaxslariga noqonuniy ravishda taqdim etilganligi ma’lum bo‘lgan. Yetkazilgan zarar miqdori 1,47 milliard so‘mni tashkil qilgan.
Qayd etilishicha, gaz quyish shoxobchasi mansabdor shaxslari hamda “Hududgaz Toshkent” MChJ mansabdor shaxslariga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Izoh (0)