Kanada bosh vaziri Jastin Tryudoning Kanada razvedkasi ma’lumotlariga asoslanib ma’lum qilishicha, “Ukraina xalqaro avialiniyalari” (MAU)ning Tehron yaqinidagi halokatga uchragan samolyoti Eronning “yer—havo” tasnifidagi raketasi tomonidan urib tushirilgan.
“Ehtimol, bu qasddan qilinmagandir”, — deya Tryudoning so‘zlaridan iqtibos keltirmoqda CNN. Kanada bosh vaziri voqea aynan qanday yuz berganini aniqlash maqsadida izchil tergov olib borishga chaqirdi.
https://twitter.com/ABC/status/1215364865289850887
Keyinroq Buyuk Britaniya bosh vaziri Boris Jonson ham kanadalik hamkasbining fikrini qo‘llab-quvvatlab chiqdi — uning aytishicha, Britaniyada samolyot Eron raketasi bilan urib tushirilganini tasdiqlovchi dalillar bor.
Avvalroq Newsweek, CBS News, CNN va boshqa bir qator nashrlar Pentagon va boshqa amerikalik rasmiylarga asoslanib, Eron Ukraina samolyotini “Tor” zenit-raketa majmuasidan uchirilgan bitta yoki ikkita raketa bilan urib tushirgani haqida xabar tarqatgan edi.
AQSh rasmiylari raketa zarbasi tasodifan berilganini ta’kidlamoqda. CNN ma’lumotlariga ko‘ra, raketalar AQSh Eronga hujum qilib qolishi mumkin degan xavotir bilan uchirilgan bo‘lishi mumkin.
Tehron yaqinida Boeing 737 samolyotining qulashi oqibatida 176 kishi — 82 nafar eronlik, 63 nafar kanadalik, 11 nafar ukrain, 10 nafar shved, to‘rt nafar afg‘on, uch nafar nemis va uch nafar britaniyalik halok bo‘lgan edi.
Izoh (0)