Ливан прокуратураси Renault-Nissan-Mitsubishi автоконцернининг собиқ раҳбари Карлос Гонга мамлакатни тарк этишни тақиқлаб қўйди. Ушбу қарор Интерполнинг Япониядаги бюроси илтимосига кўра Гонни қўлга олишга ордер бергани билан боғлиқ.
Прокурорлар Гондан Франция паспортини топширишни сўраган. Аввал Nissan концерни собиқ раҳбари 2 соат давомида сўроқ қилингани маълум бўлганди.
Гондан Ливанда яшайдиган манзилини кўрсатиш, мамлакат билан расман уруш ҳолатида бўлган Исроилга 2008 йилда амалга оширган сафарининг тафсилотлари, у ерда кимлар билан учрашгани, нималар бўлгани ҳақида сўралган.
Гонни ушлаш учун Интерпол томонидан берилган рухсатноманинг бажарилиши мажбурий эмас. Ливан ҳамда Япония ўртасида гумонланувчиларни ўзаро экстрадиция қилиш борасида халқаро келишувлар имзоланмаган. Шу сабабли Кунчиқар юрт вакилларининг Гонни олиб кетиб, Японияда унга нисбатан айбловлар эълон қилиш ҳақидаги режалари амалга ошмаслиги мумкин.
Собиқ топ-менежер корпорация пулларини ўз эҳтиёжлари учун сарфлаш, ишончни суистеъмол қилиб пулларни ўзлаштириш ва реал даромадларни яширишга уринганликда айбланмоқда.
Токиода уй қамоғида бўлган Гонн декабрь охирида Япониядан Ливанга қочиб кетганди. Уни қочиб юборган етти нафар одам Туркияда ҳибсга олинган. Кейинчалик аэропорт ходими агар Гонинг қочишига ёрдам бермаса оиласига зарар етиши ҳақида таҳдидлар бўлганини қайд этган. 8 январда Nissan собиқ раҳбарининг рафиқаси Керол Нахас эрининг иши бўйича сўроқда ёлғон кўрсатмалар берганликда гумон қилинган ва Япония прокуратурасига аёлни ҳибсга олиш юзасидан ордер берилганди.
Изоҳ (0)