Iroq poytaxtidagi qattiq qo‘riqlanadigan “yashil hudud” ichida yana raketa hujumi yuz berdi. Al-Arabiya xabariga ko‘ra, AQShning Bag‘doddagi elchixonasi oldida portlashlar yuz bergan. Telekanal ma’lumotlariga ko‘ra, hujum vaqtida “Katyusha” turiga mansub raketalardan foydalanilgan.
Portlashlarning biri bevosita elchixona yaqinida, ikkinchisi esa “yashil hudud”ga kirish joyidagi nazorat-o‘tkazish punkti oldida yuz bergan. Tinch aholi vakillaridan bir necha kishi tan jarohati olgan. Qurbonlar haqida hozircha ma’lumot yo‘q.
https://twitter.com/AlArabiya_Eng/status/1213916292694126593
Bag‘dodda 4-yanvar kuni ham raketa hujumi kuzatilgan edi. Unda ham zarba AQSh elchixonasi oldidagi hududga berilgan edi.
Iroqdagi vaziyat AQSh prezidenti Donald Trampning buyrug‘iga asosan Bag‘dodda eronlik general Qosim Sulaymoniy o‘ldirilganidan so‘ng keskinlashdi.
Eron AQShning bu harakatiga “harbiy javob” qaytarishga va’da berdi. Tramp esa, agar amerikaliklarga biror hujum uyushtiriladigan bo‘lsa, AQSh Eronning 52 ta obyektiga zarba berishga tayyorligini ta’kidladi.
Izoh (0)