Yangi yilning dastlabki kunlaridayoq kuchli yoqqan yomg‘ir natijasida Samarqand shahridagi Rudakiy ko‘chasining qurilish-montaj ishlari olib borilgan qismida cho‘kish holati kuzatilgani haqida xabar qilingan edi. Mazkur ko‘cha ijtimoiy tarmoqlarda ham keng muhokamalarga sabab bo‘ldi.
Samarqand shahar hokimligi matbuot xizmatining bildirishicha, ushbu holat bo‘yicha viloyat hokimligi tomonidan Davlat moliyaviy nazorat boshqarmasi, qurilish nazorati inspeksiyasi hamda Yo‘l-qurilish ishlari sifatini nazorat qilish va Ichimlik suvini nazorat qilish inspeksiyasi mutaxassislaridan iborat ishchi guruh tuzildi.
Ma’lumotlarga ko‘ra, ushbu obyektda qurilish-montaj ishlari “Suv ta’minoti va oqova suv obyektlari qurilishi bo‘yicha injiniring kompaniyasi” DUK Samarqand viloyat hududiy boshqarmasi buyurtmasi asosida “Bag‘dod Karvon” MChJ tomonidan olib borilgan.
1,18 kilometr uzunlikdagi oqova suv quvurlari qurilishi uchun buyurtmachi bosh pudratchiga 6,2 milliard so‘m mablag‘ o‘tkazib berilgan. Ishchi guruh tomonidan o‘tkazilgan nazorat o‘lchovining dastlabki ma’lumotiga ko‘ra, ushbu obyektda 2 milliard so‘mlik qurilish ishlari sifatsiz va 593 million so‘mlik ishlar to‘liq bajarilmaganligi aniqlangan.
Qurilish nazorati inspeksiyasi va boshqa ishchi guruh a’zolari tomonidan tekshirish yakunlanib, to‘plangan hujjatlar tegishli tartibda prokuratura organlariga topshirilishi va qonuniy qaror qabul qilinishi ta’minlanadi.
“Ayni paytda o‘rganish ishlari davom etyapti va natijalar haqida batafsil ma’lumot beramiz“, — deyiladi matbuot xizmati xabarida.
Izoh (0)