2007-yildagi Soliq kodeksida nazarda tutilgan soliqlar va boshqa majburiy to‘lovlar bo‘yicha imtiyozlar 2020-yilning 1-apreliga qadar amal qiladi. Bu haqda 4-yanvar kuni Adliya vazirligi tashabbusi bilan tashkil etilgan brifingda ma’lum qilindi, deya xabar bermoqda “Daryo” muxbiri.
Joriy yil 1-yanvariga qadar qabul qilingan soliq to‘g‘risidagi qonun hujjatlarida nazarda tutilgan soliqlar va boshqa majburiy to‘lovlar bo‘yicha imtiyozlar ularning muddati tugagunga qadar amalda bo‘ladi. Bundan tashqari, qonunga ko‘ra, yagona ijtimoiy to‘lov, yagona soliq to‘lovi va qat’iy belgilangan soliq o‘rniga tegishlicha ijtimoiy soliq, aylanmadan olinadigan soliq hamda qat’iy belgilangan miqdorda jismoniy shaxslardan olinadigan daromad solig‘i kiritilmoqda.
—Yangi soliq kodeksi bo‘yicha ishlashimizga 1,5 yil vaqt ketdi. Bu yerda og‘ir masalalarni hal etishga to‘g‘ri keldi. Jarayonga o‘zimizning olimlar, Jahon banki, xalqaro valyuta fondi kabi xalqaro moliya institutlari mutaxassislarini jalb qildik. Ushbu soliq kodeksining oldingilardan farqi shundaki, avval faqat bir tomonlama ishlab chiqilgan edi. Hatto “Sizlarning soliq kodekslaringiz faqat davlat budjetini ko‘paytirishdan iborat. Tadbirkorlarni qo‘llab-quvvatlashga yo‘naltirilmagan”, degan e’tirozlar ham bildirilgan. Yangi kodeksda QQS bo‘yicha tubdan o‘zgarish bo‘ldi, — dedi Davlat soliq qo‘mitasi raisi birinchi o‘rinbosari Mubin Mirzayev.
DSQ rasmiysining ta’kidlashicha, 2019-yilda 24 trillion so‘mdan ortoq QQS yig‘ilgan.
Birgina 2019-yilning o‘zida korxona va tashkilotlarda 800 mingdan ko‘proq ishchi-xodim sonini legallashtirish imkoni paydo bo‘ldi. 5,3 milliondan ortiq jismoniy shaxs daromad solig‘i to‘lovchisi sifatida ro‘yxatdan o‘tdi. Vaholanki, undan avvalgi yilda ularning soni 4,5 million atrofida edi. Oxirgi o‘n yil ichida soliq to‘lovchilar soni deyarli oshmagandi: 4,4—4,5 million atrofida edi.Brifingda ma’lum qilinishicha, yangi tahrirdagi Soliq kodeksida soliqlarni unifikatsiyalash, o‘xshash soliq solish bazasiga ega soliqlarni birlashtirish orqali ular soni maqbullashtirildi, soliq hisobotlari kamaytirildi va soddalashtirildi.2019- yilda esa bu ko‘rsatkich rasmiy ravishda yuqoriladi.Biz o‘tgan yili prognoz bo‘yicha 24 trillion so‘mga yaqin qo‘shilgan qiymat solig‘i yig‘ishimiz kerak edi. Buni deyarli ortig‘i bilan bajardik. 2018-yilga nisbatan tushumlarni 1,8 baravar ko‘paytirish imkoniyatiga ega bo‘ldik.
Mubin Mirzayev, Davlat soliq qo‘mitasi raisi birinchi o‘rinbosari
Shuningdek, soliq organlari soliq tekshiruvlarining quyidagi turlarini o‘tkazishi belgilandi:
- kameral soliq tekshiruvi;
- sayyor soliq tekshiruvi;
- soliq auditi.
Izoh (0)