Madina Muxtorova onalik huquqidan mahrum etilishi mumkin

Taniqli aktrisa Madina Muxtorova kenja o‘g‘li, 13 yoshli M.O.ga nisbatan onalik huquqidan mahrum etilishi mumkin. Bu haqda 4-yanvar kuni Yunusobod tumani IIO FMBda o‘tkazilgan brifingda Yunusobod tumani hokimligi vasiylik va homiylik organi mutaxassisi Muxlisa Qosimova ta’kidlab o‘tdi, deya xabar bermoqda “Daryo” muxbiri Mirolim Isajonov.

Muxlisa Qosimovaning ta’kidlashicha, M.O. ishtirokidagi har bir video, bola bilan bog‘liq holat Yunusobod tumani hokimligi vasiylik va homiylik organi tomonidan o‘rganilgan. Qosimova xonim “bolani nega reabilitatsiya markaziga joylashtirmadinglar yoki olib qo‘ymadinglar?”, degan savollar ko‘p tushayotganini ta’kidlab, bola qanday holatlarda onasidan olib qo‘yilishi mumkinligini eslatib o‘tdi:

• agarda bolaga o‘sha xonadonda sharoit yaratilmagan bo‘lsa;
• bolaga ota-ona tomonidan tan jarohati yetkaziladigan bo‘lsa;
• ota-ona bolaning sog‘lig‘iga, kamolotiga, rivojlanishiga e’tibor bermayotgan bo‘lsa;
• ona axloqsiz hayot tarzini kechiradigan bo‘lsa;
• yashash sharoiti mavjud bo‘lmagan taqdirda.

Yunusobod tumani hokimligi vasiylik va homiylik organi vakilining qo‘shimcha qilishicha, Madina Muxtoravani onalik huquqidan mahrum etish yoki etmaslik tergov xulosalariga asosan belgilanadi.

Oila kodeksining 73- va 75-moddalariga binoan, ota-ona bolaning sog‘lig‘iga, ta’lim-tarbiyasiga ahamiyat berishi kerak. Agar aktrisa Madina Muxtorova voyaga yetmagan farzandini yolg‘iz, katta farzandi bilan tashlab qo‘ygan bo‘lsa, chindan bola tarbiyasi bilan shug‘ullanmagan bo‘lsa, Oila kodeksining 75-moddasiga asosan, buning uchun qonun oldida javob beradi.

Barcha xatti-harakatlar isbotlanganidan keyin, biz tuman prokuraturasi bilan hamkorlikda fuqarolik ishlari bo‘yicha sudga Madina Muxtorovani onalik huquqidan maxrum qilishga da’vo arizasi kiritamiz. Keyinchalik bolani muqobil joylashtirish choralarini ko‘ramiz.

Ya’ni, agar bolani yaqin qarindoshlari o‘z vasiyligiga oladigan bo‘lsa, u oila tarbiyasida tarbiyalanishi uchun qarindoshlariga vasiylikka beramiz. Mabodo qarindoshlari orasida xohish bildiradigan shaxslar bo‘lmasa, unda biz bolani Mehribonlik uyiga joylashtirishga majbur bo‘lamiz.

Muxlisa Qosimova, Yunusobod tumani hokimligi vasiylik va homiylik organi mutaxassisi

Ayni vaqtda, Muxlisa Qosimova vaziyat yuzasidan shoshilinch xulosalar chiqarmaslikka, olib borilayotgan tekshiruv ishlari xulosalarini kutishga chaqirdi.

Bola onasi bilan birga tushgan videorolikda baxtli jarayonlarni ko‘rsatayotganini ham e’tiborga olish kerak. Undan psixolog ishtirokida tushuntirish xati olingan, u onasi bilan yashash istagini bildirgan. Agar Madina Muxtorova bolaga barcha sharoitlarni yaratib, tarbiyasi bilan shug‘ullanadigan bo‘lsa, farzandni onadan tortib olish maqsadga muvofiq emas.

Maktab ma’muriyati bilan ham gaplashdik. Boladan akasi va kelinoyisidan tashqari, 2019-yil dekabr oyi oxirlarida onaning o‘zi ham maktabga borib, o‘g‘lining baholari, xulqidan xabar olib turgan. Shu bois, oldindan turli xulosalar chiqarmaylik. Hozir Aytilayotgan har qanday fikr bolaning ruhiyatiga ham ta’sir ko‘rsatadi.

Muxlisa Qosimova, Yunusobod tumani hokimligi vasiylik va homiylik organi mutaxassisi