Namangan shahrida 2020-yil birinchi choragi davomida barcha 34 ta chorraha yo‘l harakat qoidalari buzilishini qayd etuvchi kameralar bilan jihozlanadi. Bu haqda viloyat IIB YHXB boshlig‘i Baxtiyor Do‘stmuhammedov jurnalistlar bilan bo‘lib o‘tgan matbuot anjumanida ma’lum qildi, deya xabar beradi “Daryo” muxbiri Azizbek Abduvaliyev.
Hozirda shahardagi 6 ta chorrahada shunday kameralar ishlab turibdi.
Baxtiyor Do‘stmuhammedovning ta’kidlashicha, kelgusi yili viloyatdagi 56 ta manzilga fotoradar o‘rnatiladi. Shuningdek, yo‘l harakat qoidalari buzilishini qayd etuvchi 5 ta maxsus avtomobil harakatlanishni boshlaydi. Ulardan uchtasi hozirda jihozlab bo‘lingan.
—Ular asosan tezlikni oshirish, belgilanmagan joyda to‘xtab turish, chiziqni bosish kabi qoidabuzarliklarni qayd etadi. Ko‘proq aholi gavjum joylar, xususan, bozorlar yaqinida tirbandlikni bartaraf etish bilan shug‘ullanadi, — deydi YHXB boshlig‘i.
“Daryo” muxbirining viloyatda joriy yil 10 oyi davomida o‘lim bilan tugagan yo‘l-transport hodisalari ko‘rsatkichi o‘tgan yilga nisbatan ortib ketganligi bilan bog‘liq savoliga Baxtiyor Do‘stmuhammedov shunday javob berdi:
— Bunday avtohalokatlar asosan Qamchiq dovonidan vodiyga kirib kelishda ko‘proq sodir bo‘lmoqda. Yo‘llarning torligi, yoritilish holati, qolaversa, haydovchilarning charchog‘i kabi omillar bunda katta rol o‘ynayapti. Shu sababli bunday yo‘llarda YPX inspektorlari tunda qaytayotgan haydovchilarga biroz tin olishlarini aytib, issiq choy yoki qahva taklif etmoqda. Qolaversa, yo‘llarni ta’mirlash, trassalarni yoritish, svetoforlar o‘rnatish kabi masalalar bo‘yicha mahalliy hokimliklarga taqdimnomalar kiritilmoqda, — deydi Baxtiyor Do‘stmuhammedov.
Matbuot anjumani davomida jurnalistlar joriy yil 21—22-dekabr kunlari Qamchiq dovoni yopilib qolganda jonbozlik ko‘rsatgani uchun YPX inspektorlari va ularga shaxsan o‘zi boshchilik qilgan YHXB rahbariga minnatdorlik bildirdi.
Izoh (0)