O‘zbekiston transport vazirligi mamlakat aeroportlarini rivojlantirish strategiyasi ustida ishlash uchun germaniyalik va rossiyalik ekspertlarni jalb qildi, deb xabar berdi “Gazeta.uz”.
Germaniyaning Airport Research Center va Rossiyaning fuqaro aviatsiyasi innovatsion markazi ekspertlari O‘zbekiston aeroportlari tarmog‘ining qisqa va uzoq muddatli rivojlanish strategiyasini ishlab chiqadi.
Shuningdek, kompaniya yo‘lovchi terminalini modernizatsiya qilish uchun texnik-iqtisodiy asos va Toshkent aeroportining master-planini tayyorlashda ishtirok etadi.
Tahlil natijalariga ko‘ra, ekspertlar texnologik jarayonni optimallashtirish va xizmat ko‘rsatish sifatini yaxshilash, shuningdek, aeroportning o‘tkazuvchanligini oshirishga qaratilgan yechimlarni joriy etish bo‘yicha tavsiyalar beradi.
2019-yilning may oyi oxirida O‘zbekiston hukumati Rossiyaga qarashli “Novaport” kompaniyasi bilan Samarqand, Namangan va Urganch aeroportlarini modernizatsiya qilish bo‘yicha shartnoma imzolagan edi.
Biroq, Rossiyaning “Kommersant” nashri ma’lumotlariga ko‘ra, O‘zbekiston hukumati va “Novaport” o‘rtasidagi muzokaralar boshi berk ko‘chaga kirib qolgan. Hukumat ushbu aeroportlarni investor so‘rayotganidek 30 yil muddatga konsessiyaga berishga tayyor emas.
Mavzuga doir:
- Rossiyaning “Novaport” kompaniyasi O‘zbekiston aeroportlarini modernizatsiya qiladi
- Samarqand, Namangan va Urganch aeroportlari Rossiyaning “Novaport” kompaniyasiga o‘tishi yuzasidan rasmiy munosabat
- O‘zbekiston aeroportlari kimga nasib etadi? Rossiya kompaniyasi bilan muzokaralar boshi berk ko‘chaga kirib qolgan
Izoh (0)