O‘zbekistonda safarda yurgan shaxslar tomonidan amalga oshiriladigan “chelnok” (mokilik) savdosi hajmi qisqarishda davom etmoqda. Markaziy bankning joriy yil 9 oyi yakunlari sharhi shundan dalolat bermoqda, deya xabar beradi Spot.
Mokilik savdosi — safarda bo‘lib turgan shaxs tomonidan o‘z mamlakatida (yoki undan tashqarida) qayta sotish maqsadida tovar sotib olish bo‘yicha operatsiya. Masalan, O‘zbekistondagi do‘konlarda qayta sotish maqsadida Turkiya va Xitoy kabi mamlakatlardan mahsulot tashish.
2019-yil 9 oyi davomida bunday savdo hajmi 375,8 million dollarni tashkil etdi. Taqqoslash uchun, o‘tgan yilning shu davrida bu ko‘rsatkich 923 million dollarga teng edi.
Xususan, chelnok importi keskin qisqardi — 249,4 million dollar (o‘tgan yili 737,8 million dollar bo‘lgan). Chelnok eksporti esa 126,4 million dollarni tashkil etdi (2018-yilda 185,2 million dollar).
Qayd etish joizki, O‘zbekistonda rasmiy savdo hajmi salmoqli darajada — 20,1 milliard dollardan 27,4 milliard dollargacha ko‘tarildi.
Izoh (0)