“Investitsiyalar va investitsiya faoliyati to‘g‘risida”gi qonun Prezident tomonidan imzolandi, deb xabar bermoqda “Huquqiy axborot”. Qonun bilan tayanch tushunchalar joriy etildi, asosiy prinsiplar belgilandi.
Qonunga ko‘ra, investitsiyalar mo‘ljallangan obyektiga ko‘ra kapital, moliyaviy va ijtimoiy turlarga bo‘linadi.
Inson salohiyatini, ko‘nikmalarini va ishlab chiqarish tajribasini rivojlantirishga, shuningdek nomoddiy boyliklarning boshqa shakllarini rivojlantirishga kiritiladigan investitsiya ijtimoiy investitsiya hisoblanadi.
Shuningdek, qonun bilan investitsiyalarni amalga oshirish shakllari, investitsiya resurslari belgilandi.
Xususan, pul mablag‘lari (shu jumladan chet el valyutasi) va boshqa moliyaviy mablag‘lar, shu jumladan kreditlar, paylar, ulushlar, aksiyalar va boshqa qimmatli qog‘ozlar, ko‘char va ko‘chmas mol-mulk hamda boshqa obyektlar investitsiya resurslari jumlasiga kiradi.
Bundan tashqari, qonunda investorning, investitsiya faoliyati ishtirokchisining huquqlari, majburiyatlari, investitsiya faoliyati subyektlarining huquqiy kafolatlari mustahkamlandi.
Unga ko‘ra, davlat investitsiyalarning O‘zbekiston qonun hujjatlariga va xalqaro shartnomalariga muvofiq himoya qilinishini kafolatlaydi. Investorlarning investitsiyalari va boshqa aktivlari natsionalizatsiya qilinmaydi.
Ushbu qonun rasmiy e’lon qilingan kundan e’tiboran bir oy o‘tgach kuchga kiradi.
“Investitsiyalar va investitsiya faoliyati to‘g‘risida”gi qonunning to‘liq matni bilan quyidagi havola orqali tanishish mumkin.
Izoh (0)