Joriy yilning o‘tgan davri mobaynida 37 nafar samarqandlik o‘z xohishi bilan xorijdan Vataniga qaytdi. 49 nafar fuqaro esa majburiy tartibda ushlab kelindi, — deya xabar beradi “Daryo” muxbiri Farhod Norbo‘tayev.
Ma’lum bo‘lishicha, Samarqand shahrida viloyat IIB rahbarlari ishtirokida qidiruvda bo‘lgan fuqarolarning oila a’zolari bilan muloqot tashkil qilingan. Tadbirda ta’kidlanishicha, ayni paytda 600 nafardan ortiq samarqandlik qidiruvda bo‘lib, ular Rossiya, Qozog‘iston, BAA, Turkiya, AQSh hamda Yevropa mamlakatlarida yuribdi.
— Boshqa mamlakatlarda amalga oshirilgan tadbirlar davomida 102 nafar shaxs qo‘lga olingan bo‘lib, ularning 49 nafari viloyatga olib kelindi, — deydi viloyat IIB boshlig‘ining birinchi o‘rinbosari Farhod Hasanov. — Bundan tashqari 35 nafar samarqandlik ayni damda Rossiyada ushlab turilibdi. Majburiy tartibda ushlab kelinganlar orasidan 40 nafar shaxsning aybi isbotlanib, jazosi qamoq bilan bog‘liq bo‘lmagan ehtiyot choralariga o‘zgartirildi.
Ta’kidlanishicha, Samarqand shahridan qidiruvga berilgan 309 nafar shaxslarning 84 nafarini ayollar tashkil etadi.
Tadbirda so‘z olgan mutasaddilar o‘z ixtiyori bilan ortga qaytgan fuqarolarning jazolari yengillashtirilishi, bu ular uchun har tomonlama foydali ekanligini ta’kidlab o‘tdi.
— Ichki ishlar organlari tomonidan o‘tkazilgan tadbir davomida boshqa mamlakatdan majburiy tartibda ushlab kelinish fuqaroga qimmatga tushadi, — deydi Farhod Hasanov. - Avvalo uning aybi yengillashmaydi. Bundan tashqari chet elda o‘tkazilgan tadbir xarajatini ham to‘lashiga to‘g‘ri keladi.
— 2013 yil jinoyat qilib, chet elga qochib ketgandim, - deydi pastdarg‘omlik Fayzullo Uzoqov. – Ustimdan Jinoyat Kodeksining 168-moddasi 2-qismi bilan jinoyat ishi ochilgan. 6 yildan buyon Rossiyada yurgandim. Onam chaqirdi. 3 nafar farzandim va onamning oldiga qaytganimdan xursandman. Samarqand viloyati Ichki ishlar boshqarmasi kelgunimcha hamma sharoitni yaratib berdi. O‘z xohishim bilan keldim. Onamning xursandchiligi mening boyligim. Ketganimda qizim 4, o‘g‘lim 10 yoshda edi. Hozir qizim 10 yosh, o‘g‘lim esa 16 yoshga kiribdi. Jinoyat sodir etib qidiruvda yurgan hamyurtlarimizga qarata aytmoqchimanki, o‘zingiz kelsangiz qilgan aybingiz yengillashtiriladi. Men bunga amin bo‘ldim.
2014-yil jinoyat sodir etib Turkiyaning Istambul shahriga ketgan Gulbahor G‘aniyevaning ta’kidlashicha, 2019-yilning 27-mart kuni ukasi IIB xodimlari tomonidan qidiruvda bo‘lgan shaxslarning qarindoshlari bilan uchrashuvda ishtirok etganidan so‘ng, unga qo‘ng‘iroq qilib O‘zbekistonga qaytishini so‘ragan.
– Avvaliga kelishga qo‘rqdim, qamalib ketaman, deb o‘yladim, — deydi Gulbahor G‘aniyeva. — Viloyat IIBdan qo‘ng‘iroq qilib qamalmasligimni aytishdi. 17-dekabr kuni profilaktika inspektori aeroportda kutib olib, uyimga oborib qo‘ydi. 5 yildan buyon qo‘rqqanim uchun kelolmaganman. Aslida menga 3 yildan 5 yilgacha qamoq jazosi berilishi kerak edi. Men hozir ozodlikdaman.
Izoh (0)