O‘zbekistonning 20 ta yirik davlat korxonasi qachon xususiylashtirilishi ma'lum bo‘ldi

O‘zbekistonda davlat ulushi yuqori bo‘lgan 20 ta yirik kompaniya aksiyalari 2021-yilning II choragida IPO orqali sotilishi rejalashtirilmoqda. Bu Kapital bozorini rivojlantirishning 2020—2025-yillarga mo‘ljallangan strategiyasi loyihasida qayd etilgan.

Aksiyalari ochiq kimoshdi savdoga chiqariladigan mazkur 20 ta kompaniyaning nomlari hozircha ma’lum emas.

Joriy yilning 27-noyabr kuni Londonda bo‘lib o‘tgan “UzInvest” forumi doirasidagi matbuot anjumanida Davlat aktivlarini boshqarish agentligi direktori Sunatulla Bekenov ro‘yxat hali to‘la shakllanmaganini ma’lum qilgan.

Agentlik rahbari “Aloqabank” va “O‘zsanoatqurilishbank” davlat banklari, O‘zbekiston tovar-xomashyo birjasi, “Kvars” shisha zavodi va “Jizzax plastmassa” zavodi xususiylashtirilishi aniqligini aytgan.

Shuningdek, barcha yog‘-moy zavodlari, “Kafolat” sug‘urta kompaniyasi, Navoiy va Olmaliq kon-metallurgiya kombinatlari, Bekoboddagi “O‘zmetkombinat”, “Qizilqumsement” kabilarni ham xususiylashtirish masalasini ko‘rib chiqilmoqda.

Bundan tashqari, Bekenov “O‘zbekneftegaz”ni xususiylashtirish masalasi ham ko‘rib chiqilayotganini ma’lum qilgan.