Жорий йилнинг ўтган даври мобайнида 37 нафар самарқандлик ўз хоҳиши билан хориждан Ватанига қайтди. 49 нафар фуқаро эса мажбурий тартибда ушлаб келинди, — дея хабар беради «Дарё» мухбири Фарҳод Норбўтаев.
Маълум бўлишича, Самарқанд шаҳрида вилоят ИИБ раҳбарлари иштирокида қидирувда бўлган фуқароларнинг оила аъзолари билан мулоқот ташкил қилинган. Тадбирда таъкидланишича, айни пайтда 600 нафардан ортиқ самарқандлик қидирувда бўлиб, улар Россия, Қозоғистон, БАА, Туркия, АҚШ ҳамда Европа мамлакатларида юрибди.
— Бошқа мамлакатларда амалга оширилган тадбирлар давомида 102 нафар шахс қўлга олинган бўлиб, уларнинг 49 нафари вилоятга олиб келинди, — дейди вилоят ИИБ бошлиғининг биринчи ўринбосари Фарҳод Ҳасанов. — Бундан ташқари 35 нафар самарқандлик айни дамда Россияда ушлаб турилибди. Мажбурий тартибда ушлаб келинганлар орасидан 40 нафар шахснинг айби исботланиб, жазоси қамоқ билан боғлиқ бўлмаган эҳтиёт чораларига ўзгартирилди.
Таъкидланишича, Самарқанд шаҳридан қидирувга берилган 309 нафар шахсларнинг 84 нафарини аёллар ташкил этади.
Тадбирда сўз олган мутасаддилар ўз ихтиёри билан ортга қайтган фуқароларнинг жазолари енгиллаштирилиши, бу улар учун ҳар томонлама фойдали эканлигини таъкидлаб ўтди.
— Ички ишлар органлари томонидан ўтказилган тадбир давомида бошқа мамлакатдан мажбурий тартибда ушлаб келиниш фуқарога қимматга тушади, — дейди Фарҳод Ҳасанов. - Аввало унинг айби енгиллашмайди. Бундан ташқари чет элда ўтказилган тадбир харажатини ҳам тўлашига тўғри келади.
— 2013 йил жиноят қилиб, чет элга қочиб кетгандим, - дейди пастдарғомлик Файзулло Узоқов. – Устимдан Жиноят Кодексининг 168-моддаси 2-қисми билан жиноят иши очилган. 6 йилдан буён Россияда юргандим. Онам чақирди. 3 нафар фарзандим ва онамнинг олдига қайтганимдан хурсандман. Самарқанд вилояти Ички ишлар бошқармаси келгунимча ҳамма шароитни яратиб берди. Ўз хоҳишим билан келдим. Онамнинг хурсандчилиги менинг бойлигим. Кетганимда қизим 4, ўғлим 10 ёшда эди. Ҳозир қизим 10 ёш, ўғлим эса 16 ёшга кирибди. Жиноят содир этиб қидирувда юрган ҳамюртларимизга қарата айтмоқчиманки, ўзингиз келсангиз қилган айбингиз енгиллаштирилади. Мен бунга амин бўлдим.
2014 йил жиноят содир этиб Туркиянинг Истамбул шаҳрига кетган Гулбаҳор Ғаниеванинг таъкидлашича, 2019 йилнинг 27 март куни укаси ИИБ ходимлари томонидан қидирувда бўлган шахсларнинг қариндошлари билан учрашувда иштирок этганидан сўнг, унга қўнғироқ қилиб Ўзбекистонга қайтишини сўраган.
– Аввалига келишга қўрқдим, қамалиб кетаман, деб ўйладим, — дейди Гулбаҳор Ғаниева. — Вилоят ИИБдан қўнғироқ қилиб қамалмаслигимни айтишди. 17 декабрь куни профилактика инспектори аэропортда кутиб олиб, уйимга обориб қўйди. 5 йилдан буён қўрққаним учун келолмаганман. Аслида менга 3 йилдан 5 йилгача қамоқ жазоси берилиши керак эди. Мен ҳозир озодликдаман.
Изоҳ (0)