Sirdaryo viloyati Yangiyer shahrida Prezident tashabbusi bilan O‘zbekiston kasaba uyushmalari Federatsiyasiga qarashli “Yangiyer” sanatoriysining tantanali ochilish marosimi bo‘lib o‘tdi. Bu haqda Sog‘liqni saqlash vazirligi xabar berdi.
Unda O‘zbekiston Prezidenti maslahatchisi Abdujabbor Abduvohidov, O‘zbekiston kasaba uyushmalari Federatsiyasi raisi Qudratilla Rafiqov, Sog‘liqni saqlash vaziri Alisher Shodmonov, Sirdaryo viloyati hokimi G‘ofur Mirzayev, shuningdek, hamkor tashkilot va idoralar vakillari ishtirok etdi.
Tadbirga tashrif buyurgan mehmonlar sanatoriyda yaratilgan shart-sharoitlar bilan yaqindan tanishdi.
Bu yerda bir vaqtning o‘zida 250 kishi dam olishi va salomatligini tiklashi mumkin. Sanatoriydagi yodobromli mineral suv yurak-qon tomir, markaziy va periferik nerv tizimi, teri kasalliklari, serebral ateroskleroz, tayanch-harakat tizimining yallig‘lanishi va jarohatdan keyingi oqibatlar, reyno xastaligi, ayollar bepushtligining endokrin shakllari, ekzogen-konstitutsion semirish kabi kasalliklarni davolashda samarali ta’sir ko‘rsatadi.
Sanatoriyni qurish va uni zamonaviy tibbiy diagnostika jihozlari bilan ta’minlashga O‘zbekiston kasaba uyushmalari hisobidan jami 84 milliard so‘m mablag‘ sarflandi. Sihatgohda 80 ta yangi ish o‘rni yaratildi va tez fursatda muassasada 110 nafar ishchi xodim faoliyat yuritadi.
Izoh (0)