Электроника ва маиший техника бозорида етакчилардан бири бўлган Қозоғистоннинг Sulpak компанияси Ўзбекистондаги вазиятни диққат билан кузатаётганини маълум қилди. Бу ҳақда Spot хабар бермоқда.
«Ушбу бозор ривожланганлиги ва аҳоли кўплиги учун катта салоҳиятга эга. Ҳозирги вақтда Ўзбекистон Евросиё иқтисодий иттифоқи билан янада тиғиз бирикиши зарур», — деди компания бош директори Дмитрий Провкин.
Унинг айтишича, Ўзбекистон қонунчилигида айни пайтда бозорга хорижий компаниялар киришини чекловчи ва маҳаллий ишлаб чиқарувчилар манфаатини кўзловчи божхона талаблари ҳамда акцизлар нуқтаи назаридан қатор чекловлар мавжуд.
«Интеграциялашув билан боғлиқ жиҳатлар ҳал бўлиши билан Ўзбекистонга кирамиз. Чунки Қозоғистон ва Қирғизистонда самарали ишлаётган бизнес-моделимиз Ўзбекистон бозорида ҳам иш беради деб ўйлаймиз. Юз бераётган ўзгаришлардан хабардормиз ва вазиятни диққат билан кузатяпмиз», — таъкидлади Провкин.
Маълумот учун, Sulpak Қозоғистон ва Қирғизистондаги 55 та аҳоли пунктида 130 та гипермаркет ва 21 та алоқа офисларига эга. Жорий йилда кутилаётган тушум 320 миллиард тенгени ( 800 миллион доллардан ошиқ) ташкил этади.
Изоҳ (0)