АҚШдаги қорбўрон ўйнаш тақиқланган шаҳарда ҳатто шаҳар мэри ва полиция бошлиғи ҳам бу тақиқни бузди (видео)

АҚШнинг Висконсин штатида жойлашган Уосау шаҳри расмийлари қорбўрон ўйнашга 50 йил аввал қўйилган тақиқни қайта кўриб чиқишга қарор қилди. Бу ҳақда Meduza хабар берди.

Қорбўрон ўйнашни тақиқловчи қонун 1962 йилда қабул қилинган. Унга кўра, ҳар қандай нарсани, буюмни, ўқни, тошни, қор бўлагини ёки анжомларни бирор бошқа кишига улоқтириш тақиқланади.

Деярли ҳар йили қишки байрамлар мавсумида бутун мамлакат бўйлаб матбуотда Уосау ҳақида мақолалар чиқади. Уларда журналистлар шаҳарда амалда бўлган тақиқнинг устидан кулади. Бу сафар Barstool Sports нашри хатолик сабабли мазкур қонун «яқинда» амалдаги мэр томонидан имзоланганини таъкидлаб, Уосауни «АҚШнинг энг ёмон шаҳри» деб атагач, шаҳар расмийларининг сабр косаси тўлди.

Шаҳар кенгашидаги узоқ давом этган мажлисдан сўнг, қонунни бекор қилишга қарор қилинган. Юридик жиҳатдан қонун 2020 йил январь ойида бекор қилинади. Мазкур мажлисга депутатлардан бири қўлида бир бўлак қор билан келган ва уни бутун зал бўйлаб отган, қор бўлаги эса полиция бошлиғининг ноутбукига бориб теккан.

Полиция бошлиғининг ўринбосари, ўз навбатида, махсус видеомурожаат ёзган ва унда қонун ўз кучида бўлса ҳам, қўрбўрон ўйнаганлик учун ҳеч ким жазоланмаслигини ваъда қилган. Видеомурожаат чоғида орқа томонда хизмат формасидаги полициячиларнинг қорбўрон ўйнаётганини мумкин. Видеонинг охирида эса полиция раҳбари ўринбосари шаҳар мэрини қор билан «ўққа тутган».

Шаҳар кенгаши томонидан қайд этилишича, АҚШнинг кўплаб шаҳарларида ҳеч қачон амалда қўлланилмайдиган ғалати маҳаллий қонунлар мавжуд. Уларнинг бекор қилинмаслигига эса улар ҳақида ҳеч ким эсламаслиги сабаб бўлади.