Toshkentdagi Inha universitetining to‘rtinchi kurs talabalari Abdulloh Asqarov, Shahobiddin O‘rmonov, Sardor Ibrohimov, Bedilbek Hamidov, Eldor Abduhamidov va Sherzod Niyozov va professor Frensis Tay boshchiligida C-Vision noyob sun’iy ko‘rish tizimini yaratdi. Bu haqda “Daryo”ga universitet matbuot xizmati xabar berdi.
“Dastur odamning qarashini aniqlaydi, uning his-tuyg‘ularini taniydi va ushbu ma’lumotlarni, masalan, real vaqtda ma’ruzachining ma’ruzasi bilan taqqoslaydi. Ushbu xizmat ma’ruzaning har soniyasida tinglovchilar tomonidan idrok etish yoki sezmaslik darajasini belgilaydi”, — deydi talaba Abdulloh Asqarov.
Ishlab chiqaruvchilarning xabariga ko‘ra, dastur mobil hisoblanib, undan ta’lim, xavfsizlik, reklama kabi turli sohalarda foydalanish mumkin.
“Dastur katta tadbirlarda xavfsizlikni ta‘minlash uchun ishlatilishi ham ko‘zda tutilgan. Masalan, bir necha soniya ichida xizmat hissiyotlarni taniy oladi va tahlil qiladi, natijada sport stadionida, kontsert zalida minglab odamlarning niyatlarini aniqlab bera oladi. Dastur salbiy his-tuyg‘ularga ega odamlarni aniqlaydi va ularni alohida klasterga joylashtiradi. Bu xavfsizlik xodimlarining ishini ancha yengillashtiradi”, — deydi ishlab chiqaruvchilar.
Bundan tashqari, ta’lim sohasida qo‘llash mumkin bo‘lib, u talabalarning dars jarayonida qanchalik qiziqish bilan ishtirok etayotganini aniqlaydi.
“Bizning sun’iy intellekt professori, professor Frensis Tay No ushbu dasturni yaratishda bizni ilhomlantirdi. Uning so‘zlariga ko‘ra, nafaqat nazariy bilimlarga ega bo‘lish, balki uni hayotda qo‘llash kerak. Biz kurs loyihasini olgach, dastlab shahar ko‘chalarida videokuzatuv xizmatini yaratishga qaror qildik.
Biz buni reklama agentliklariga ham tavsiya etamiz. Shuningdek, agar siz ko‘chalarga kameralar o‘rnatadigan bo‘lsangiz, dastur orqali shahar aholisining umumiy hissiy holatini kuzatishingiz mumkin”, — deya qo‘shimcha qilgan ishlab chiquvchi.
Ta’kidlanishicha, Toshkent shahridagi Inha universiteti talabalari Varshavada bo‘lib o‘tgan Microsoft Thenext AIGuardians—2019 xalqaro sun’iy intellekt tanlovida birinchi marotaba ishtirok etdi va final bosqichiga chiqib, uning g‘olibiga aylandi.
Bundan tashqari, xuddi shu loyiha bilan talabalar Google TakeOff—2019 xalqaro startap tanlovida ishtirok etib, eng yaxshi 50 talik loyihadan joy oldi.
Izoh (0)