Тошкентдаги Инҳа университетининг тўртинчи курс талабалари Абдуллоҳ Асқаров, Шаҳобиддин Ўрмонов, Сардор Иброҳимов, Бедилбек Ҳамидов, Элдор Абдуҳамидов ва Шерзод Ниёзов ва профессор Фрэнсис Тай бошчилигида C-Vision ноёб сунъий кўриш тизимини яратди. Бу ҳақда «Дарё»га университет матбуот хизмати хабар берди.
«Дастур одамнинг қарашини аниқлайди, унинг ҳис-туйғуларини танийди ва ушбу маълумотларни, масалан, реал вақтда маърузачининг маърузаси билан таққослайди. Ушбу хизмат маърузанинг ҳар сониясида тингловчилар томонидан идрок этиш ёки сезмаслик даражасини белгилайди», — дейди талаба Абдуллоҳ Асқаров.
Ишлаб чиқарувчиларнинг хабарига кўра, дастур мобиль ҳисобланиб, ундан таълим, хавфсизлик, реклама каби турли соҳаларда фойдаланиш мумкин.
«Дастур катта тадбирларда хавфсизликни таъминлаш учун ишлатилиши ҳам кўзда тутилган. Масалан, бир неча сония ичида хизмат ҳиссиётларни таний олади ва таҳлил қилади, натижада спорт стадионида, концерт залида минглаб одамларнинг ниятларини аниқлаб бера олади. Дастур салбий ҳис-туйғуларга эга одамларни аниқлайди ва уларни алоҳида кластерга жойлаштиради. Бу хавфсизлик ходимларининг ишини анча енгиллаштиради», — дейди ишлаб чиқарувчилар.
Бундан ташқари, таълим соҳасида қўллаш мумкин бўлиб, у талабаларнинг дарс жараёнида қанчалик қизиқиш билан иштирок этаётганини аниқлайди.
«Бизнинг сунъий интеллект профессори, профессор Фрэнсис Тай Но ушбу дастурни яратишда бизни илҳомлантирди. Унинг сўзларига кўра, нафақат назарий билимларга эга бўлиш, балки уни ҳаётда қўллаш керак. Биз курс лойиҳасини олгач, дастлаб шаҳар кўчаларида видеокузатув хизматини яратишга қарор қилдик.
Биз буни реклама агентликларига ҳам тавсия этамиз. Шунингдек, агар сиз кўчаларга камералар ўрнатадиган бўлсангиз, дастур орқали шаҳар аҳолисининг умумий ҳиссий ҳолатини кузатишингиз мумкин», — дея қўшимча қилган ишлаб чиқувчи.
Таъкидланишича, Тошкент шаҳридаги Инҳа университети талабалари Варшавада бўлиб ўтган Microsoft Thenext AIGuardians—2019 халқаро сунъий интеллект танловида биринчи маротаба иштирок этди ва финал босқичига чиқиб, унинг ғолибига айланди.
Бундан ташқари, худди шу лойиҳа билан талабалар Google TakeOff—2019 халқаро стартап танловида иштирок этиб, энг яхши 50 талик лойиҳадан жой олди.
Изоҳ (0)