2019 yilgi parlament saylovlari natijalariga ko‘ra Oliy Majlis Qonunchilik palatasiga saylangan dastlabki 125 nafar deputatning ro‘yxati e’lon qilindi.
Eslatib o‘tamiz, saylovning dastlabki natijalariga ko‘ra, O‘zLiDePdan — 42 nafar, “Milliy tiklanish” partiyasidan — 34 nafar, “Adolat” partiyasidan — 20 nafar, Xalq demokratik partiyasidan — 18 nafar, O‘zbekiston Ekologik partiyasidan — 11 nafar deputat saylangan.
2020-yil 5-yanvar kuni 25 ta saylov okrugida takroriy ovoz berish jarayoni bo‘lib o‘tadi.
Ma’lumot uchun, amaldagi deputatlardan 43 nafari bu yilgi saylovlarda o‘z nomzodini takroran qo‘ygandi. Ularning 36 nafari (yoki 83 foizi) saylangan (taqqoslash uchun — 2014-yilgi parlament saylovlarida nomzodi takroran qo‘yilgan 26 nafar amaldagi deputatdan 25 nafari qayta saylangan edi). Yana besh nafar deputat — Zulayho Akramova (33-Do‘stlik okrugi, O‘zXDP), Alisher Qodirov (36-Paxtakor okrugi, “Milliy tiklanish”), Adham Shodmonov (56-Registon okrugi, O‘zLiDeP), Azamat Pardayev (67-Pastdarg‘om okrugi, “Milliy tiklanish”), Mavluda Xo‘jayeva (102-Yaypan okrugi, O‘zLiDeP) takroriy ovoz berishga qolgan. Faqat ikki nafar deputat qayta saylanish imkoniyatini qo‘ldan boy bergan.
Joriy saylovlarda amaldagi ikki senator ham Oliy Majlis deputatligiga o‘z nomzodini qo‘ygan edi — senator Iqbol Mirzo (O‘zLiDeP nomzodi) 114-Quva saylov okrugidan, Maqsuda Vorisova (O‘zXDP) 91-Zangiota saylov okrugidan. Ularning har ikkalasi ham saylangan.
Izoh (0)