Ўзбекистонда меҳмонхона қурган тадбиркорга давлат томонидан илк бор 4 млрд сўмлик субсидия берилди

Ўзбекистонда меҳмонхона қурган тадбиркорга давлат томонидан илк бор 4 080 000 000 сўмлик субсидия берилди. Бу ҳақда Туризмни ривожлантириш қўмитаси матбуот хизмати хабар бермоқда.

Сертификат 21 декабрь куни «Амирсой» тоғ-чанғи курортининг тантанали очилиш маросими доирасида Бош вазир ўринбосари Азиз Абдуҳакимов томонидан Самарқанддаги «Grand Hotel Sogdiana» меҳмонхонаси эгасига топширилди.

Ҳукуматнинг 2019 йил 27 майдаги «Меҳмонхона хўжалиги фаолиятини янада ривожлантириш учун қулай шарт-шароитлар яратиш чора-тадбирлари тўғрисида»ги 433-сонли қарорига биноан инвесторларга янги қурилган меҳмонхона 3 юлдуз тоифасига ва 50 хонадан кам бўлмаган хоналар фондига эга ёки 4 юлдуз тоифасига ва 100 хонадан кам бўлмаган хоналар фондига эга бўлганда давлат бюджетидан субсидия ажратилади. Бунда янги қурилган меҳмонхона 2022 йилнинг 1 январига қадар фойдаланишга топширилиши лозим.

Инвесторларга субсидия 1 маротаба ажратилади. Унинг миқдори келгуси йил учун давлат бюджети параметрларини тасдиқлаш жараёнида ушбу миқдорни ҳар йили индексация қилган ҳолда 3 юлдуз тоифасига эга меҳмонхоналардаги ҳар бир хона учун 40 миллион сўмни, 4 юлдуз тоифасига эга меҳмонхоналардаги ҳар бир хона учун 65 миллион сўмни ташкил этади.

«Grand Hotel Sogdiana» меҳмонхонасига 3 юлдуз тоифаси берилган. Меҳмонхона «Dobusiya Samarkand Aqualand» МЧЖга тегишли бўлиб, у ерда 204 нафар мижозга мўлжалланган 102 та номер мавжуд. Меҳмонхона қурилиши 2017 йил августида бошланган, жорий йил сентябрида эса фойдаланишга топширилган.