O‘zbekiston parlament saylovlari doirasida takroriy ovoz berish jarayoni 2020-yil 5-yanvar kuni avval e’lon qilinganidek 22 ta emas, balki 25 ta saylov okrugida tashkil etiladi. Bu haqda Markaziy saylov komissiyasi (MSK)da 25-dekabr kuni bo‘lib o‘tgan majlisda e’lon qilindi, deya xabar bermoqda “Daryo” muxbiri Musulmonbek Ibrohimov.
23-dekabr kuni parlament saylovining dastlabki natijalarini e’lon qilarkan, MSK raisi Mirzo-Ulug‘bek Abdusalomov 150 ta okrugning 128 tasida deputatlar saylangani, 22 ta okrugda nomzodlarning birortasi 50 foizdan ko‘proq ovoz ololmagani sabab (ular orasida “Milliy tiklanish” partiyasi yetakchisi ham bor), takroriy ovoz berish o‘tkazilishini ma’lum qilgandi.
25-dekabrda o‘tkazilgan majlisda ma’lum qilinishcha, saylov okruglari bo‘yicha saylov natijalarini aniqlashga doir barcha bayonnomalar o‘rganib va tahlil qilib chiqilganida, ayrim saylov okruglari bo‘yicha ovozlarni hisoblash jarayonida okrug saylov komissiyalari tomonidan xato va kamchiliklarga yo‘l qo‘yilganligi aniqlangan.“Kamchiliklar Saylov kodeksining 95-moddasida ko‘rsatilgan bandlar bo‘yicha saylov natijalarini aniqlash va hisoblash bilan bog‘liq bo‘lib, saylovchilarning ovozlari soni o‘zgarmagan. Kamchiliklar Markaziy saylov komissiyasi tomonidan Saylov kodeksida belgilangan tartibda bartaraf etildi”, — deyiladi MSK bayonotida.
Xatoliklar Samarqand viloyati 67-Pastdarg‘om saylov okrugi hamda Farg‘ona viloyati 102-Yaypan va 106-Bag‘dod saylov okruglarida qayd etilgan. Arifmetik xatolik sabab ushbu okruglardan saylangan deb topilgan Azamat Pardayev (“Milliy tiklanish”), Mavludaxon Xo‘jayeva (O‘zLiDeP) va Gulbahor Saidg‘aniyeva (“Adolat”) ikkinchi turga qoldirilgan.
Ma’lumot uchun: Azamat Pardayev va Mavludaxon Xo‘jayeva amaldagi Oliy Majlis Qonunchilik palatasi deputatlari sanaladi, Gulbahor Saidg‘aniyeva esa “Farg‘ona haqiqati” — “Ferganskaya pravda” gazetalari birlashgan tahririyati bosh muharriri, Farg‘ona viloyat hokimi Shuhrat G‘aniyevning sobiq matbuot kotibi.
Izoh (0)