Qarshi tumanidagi “Shoyxo‘ja” mahallasida yashovchi aholi yo‘lning nosozligi bois aziyat chekayotgani haqida yozgandik. Mazkur maqola omma e’tiboriga havola etilgach, tuman viloyat rahbari ham ushbu masalaga e’tibor qaratgan. “Daryo”ga muammo haqida xabar bergan Gulira’no Abdiyevaning ma’lumot berishicha, mahallaning O‘zbekiston ko‘chasidagi yo‘llarda ta’mirlash ishlari olib borilgan.
— Muammoni bartaraf qilish uchun hatto viloyat hokimi ham mahallamizga keldi, — deydi Gulira’no Abdiyeva. – Viloyat rahbari va tuman mas’ullariga rahmat. Yo‘limizni tekislab berishdi. Endi yo‘l borasida muammo yo‘q.
Maqolada mahalla ahlining elektr tokidagi muammolari ham tilga olingandi. “Qashqadaryo hududiy elektr tarmoqlari” AJ matbuot xizmatining “Daryo”ga ma’lum qilishicha, elektr toki muammosini hal etish ularning ishi emas.
— Qarshi tumanidagi “Shoyxo‘ja” mahallasi O‘zbekiston ko‘chasidagi xonadonlar yakka tartibda yangidan qurilgan uy-joylar bo‘lib, maqolada ko‘rsatib o‘tilganidek, ushbu ko‘chadagi aholi tomonidan o‘zboshimchalik bilan qo‘lbola usulda tortilgan elektr uzatish tarmoqlari mavjud, — deyiladi mutasaddi tashkilot axborot xizmati munosabatida. — Natijada elektr ta’minoti yuzasidan maqolada keltirib o‘tilgan muammolar yuzaga kelgan. Mazkur holat yuzasidan uy-joylarni qurishda tuman hokimligining tegishli qarori va kadastr hujjatlari bo‘lishi lozimligi hamda O‘zbekiston Respublikasi Prezidentining 2005-yil 16-fevraldagi “Uy-joy qurilishi va uy-joy bozorini yanada rivojlantirish chora-tadbirlari to‘g‘risida”gi PQ-10 sonli qarori, shuningdek, Vazirlar Mahkamasining 2013-yil 20-fevraldagi 54-sonli bayonnomasiga asosan yakka tartibdagi uy-joy qurilishi yangi mavzelarida zarur muhandislik kommunikatsiyalar, jumladan, elektr qurilmalari bilan mahalliy budjet mablag‘lari hisobiga ta’minlanishi lozimligini ma’lum qilamiz.
Eslatib o‘tamiz, “Qishda loy kechamiz, yozda esa chang yutib yashaymiz”. Qarshi tumanida yashovchi aholi mutasaddilar e’tiborsizligidan nolimoqda” sarlavhali maqolada ko‘chaning yarmida simyog‘och yo‘qligi va kuchlanish pastligi ham tilga olingan edi.
Izoh (0)