So‘nggi ikki yilda sog‘liqni saqlash sohasidagi 581 nafar xodim turli jinoyatlarni sodir etgani uchun jinoiy javobgarlikka tortilgan. Ulardan 114 nafari yoki har to‘rtinchisining qilmishi korrupsiyaviy jinoyat hisoblanadi.
Bu haqda Korrupsiyaga qarshi kurashish bo‘yicha Respublika idoralararo komissiyasining 25-dekabr kuni bo‘lib o‘tgan navbatdagi yig‘ilishida O‘zbekiston bosh prokurori Nig‘matilla Yo‘ldoshev ma’lum qildi.
Javobgarlikka tortilgan xodimlarning uch nafari vazirlik va ixtisoslashtirilgan tibbiyot markazlarida, 49 nafari viloyat hamda 529 nafari tuman-shahar miqyosidagi muassasalarda faoliyat olib borgan.
“Tizimida korrupsiyaga qarshi kurash bo‘yicha amaliy ishlar oqsayotganligi, tizimdagi ayrim rahbarlar bu illatdan hali-beri qutula olmayotganligi, achchiq bo‘lsa-da, haqiqat. Korrupsiya xodimni ishga qabul qilishdan to moliya-xo‘jalik faoliyatini yuritish, tibbiy xizmat ko‘rsatish, dori-darmon ta’minoti kabi yo‘nalishlargacha qamrab olgan”, — dedi bosh prokuror.
Nig‘matilla Yo‘ldoshev ayrim tibbiyot xodimlarining psixotrop moddalarning noqonuniy savdosi bilan shug‘ullanayotganini “sohadagi ayanchli holatlardan biri” deb atadi. O‘tgan davrda 19 nafar xodim bunday ishga qo‘l urganligi uchun jinoiy javobgarlikka tortilgan. Ularning 12 nafari hamshiralar, yetti nafari esa shifokorlardir.
Yig‘ilishda ta’kidlanishicha, “Ijtimoiy fikr” jamoatchilik markazi tomonidan 2018-yilda o‘tkazilgan so‘rovda ishtirok etganlarning 34 foizi sog‘liqni saqlash tizimida korrupsiya keng tarqalgan, degan fikrni bildirgan bo‘lsa, 2019-yilda shunday fikrlovchi respondentlar ulushi 43 foizni tashkil etgan.
Izoh (0)