Сўнгги икки йилда соғлиқни сақлаш соҳасидаги 581 нафар ходим турли жиноятларни содир этгани учун жиноий жавобгарликка тортилган. Улардан 114 нафари ёки ҳар тўртинчисининг қилмиши коррупциявий жиноят ҳисобланади.
Бу ҳақда Коррупцияга қарши курашиш бўйича Республика идоралараро комиссиясининг 25 декабрь куни бўлиб ўтган навбатдаги йиғилишида Ўзбекистон бош прокурори Ниғматилла Йўлдошев маълум қилди.
Жавобгарликка тортилган ходимларнинг уч нафари вазирлик ва ихтисослаштирилган тиббиёт марказларида, 49 нафари вилоят ҳамда 529 нафари туман-шаҳар миқёсидаги муассасаларда фаолият олиб борган.
«Тизимида коррупцияга қарши кураш бўйича амалий ишлар оқсаётганлиги, тизимдаги айрим раҳбарлар бу иллатдан ҳали-бери қутула олмаётганлиги, аччиқ бўлса-да, ҳақиқат. Коррупция ходимни ишга қабул қилишдан то молия-хўжалик фаолиятини юритиш, тиббий хизмат кўрсатиш, дори-дармон таъминоти каби йўналишларгача қамраб олган», — деди бош прокурор.
Ниғматилла Йўлдошев айрим тиббиёт ходимларининг психотроп моддаларнинг ноқонуний савдоси билан шуғулланаётганини «соҳадаги аянчли ҳолатлардан бири» деб атади. Ўтган даврда 19 нафар ходим бундай ишга қўл урганлиги учун жиноий жавобгарликка тортилган. Уларнинг 12 нафари ҳамширалар, етти нафари эса шифокорлардир.
Йиғилишда таъкидланишича, «Ижтимоий фикр» жамоатчилик маркази томонидан 2018 йилда ўтказилган сўровда иштирок этганларнинг 34 фоизи соғлиқни сақлаш тизимида коррупция кенг тарқалган, деган фикрни билдирган бўлса, 2019 йилда шундай фикрловчи респондентлар улуши 43 фоизни ташкил этган.
Изоҳ (0)