Markaziy saylov komissiyasi mahalliy ijro hokimiyati organlari vakillari ayrim deputatlikka nomzodlarni ilgari surish uchun saylov komissiyalariga bosim o‘tkazayotgani haqida ma’lumot olgan. Bu haqda saylovlarni yoritish bo‘yicha Xalqaro matbuot markazida bo‘lib o‘tgan brifingda MSK raisi o‘rinbosari Mahmud Istamov ma’lum qildi.
Istamovning so‘zlariga ko‘ra, mahalliy ijro hokimiyati organlari vakillari quyidagi nomzodlarni ilgari surish uchun bosim o‘tkazgan:
- 142-Qoraqamish saylov okrugidan Oliy Majlis Qonunchilik palatasi deputatligiga nomzod Xurshid Do‘stmuhammadev;
- 23-Moyqo‘rg‘on saylov okrugidan Toshkent shahar kengashi deputatligiga nomzod Kamola Hamidova;
- 10-Ahil saylov okrugidan Olmazor tuman kengashi deputatligiga nomzod Nodira Sharipova.
Mahmud Istamov brifing davomida O‘zbekistonning Yaponiya, Janubiy Koreya, Xitoy, Malayziya, Singapur, Indoneziya, Tailand va Hindistondagi, shuningdek, Rossiya sharqidagi vakolatxonalarida ovoz berish jarayoni yakuniga yetganini ma’lum qildi.
Saylov natijalarini aniqlash va byulletenlarni hisoblash jarayoni allaqachon boshlangan. MSK raisi o‘rinbosarining qo‘shimcha qilishicha, xorijdagi saylov uchastkalarida 1 million 697 ming 647 nafar saylovchi ro‘yxatga olingan.
Qo‘shimcha qilishlaricha, Oliy Majlisga saylovning dastlabki natijalari 23-dekabr kuni Toshkent vaqti bilan soat 14:00 da e’lon qilinishi kutilmoqda.
Izoh (0)