Юнусободдаги метро қурилишига қуришни билмайдиган темирйўл тизими ходимлари ҳам жалб этилгани маълум қилинди

Telegram’даги «Файзбоғ.уз» каналига Юнусобод метро йўналишида содир бўлган авария юзасидан маълумотлар келиб тушди, деб ёзмоқда «Effect.uz».

Ўзини «Қўқон-Локомотив Депоси» ходими деб таништирган канал обуначиси депо ходимлари Тошкент метро қурилишига мажбурий жалб қилинаётганини билдирган. Қўйида ушбу суҳбат тўлиғича келтирилди.

Обуначи: «Қўқон-Локомотив Депоси»да ишлайман. Маълумотим олий. Навбати билан метро қурилишга жўнатишади. Гарчи қурилиш соҳасини билмасак ҳам.

«Файзбоғ.уз»: Авария бўлган ҳудудга мажбурий юборишяптими? Сиз қайси кунлари ишлашга бордингиз?

Обуначи: Август ойидан декабрь ойигача 3 маротаба 15 кундан ишлаб келдим. Бундан аввал ҳам шунга ўхшаш ҳодиса содир бўлганди. Шу ойнинг боши, 6 декабрь санасида қаттиқ ёмғир ёғаётган пайтда ҳам бизни ишлашга мажбурлашган. Лекин бу ҳолат «Туркистон» станциясида содир бўлган. Авария содир бўлган бекатдан кейинги бекатда (Юнусободдан кейинги бекат - «Файзбоғ.уз»).

«Файзбоғ.уз»: 6 декабрь «Туркистон» станциясида жабрланганлар бўлдими?

Обуначи:  Йўқ, бўлмаганди. Лекин қаттиқ ёмғир остида станцияга тушиб, бетонини қуяётган эдик.

«Файзбоғ.уз»: Метро қурилишига мажбурий жалб этиш ҳали ҳам давом этмоқдами?

Обуначи: Ҳозир ҳам метро қурилишига ташкилотимиздан ишчилар жўнатилган. Айнан «Юнусобод» мавзесига. Ҳамкасбларим авария ҳудудида эди. Телефонларига қўнғироқ қилиб тушолмаяпман.

Эслатиб ўтамиз, Тошкент метрополитенининг янги қурилаётган Юнусобод йўналиши учун Юнусобод туманида Мега Планет олдида туннел қазилаётган бўлган. 18 декабрь куни тинимсиз ёмғир ёғган. Сув туннелга тушмаслиги учун бетон лоток қилинган. Ана шу лотокнинг қайсидир қисмидан сув кетган ва сув тўпланган. Ёғингарчилик кучайган вақтда ер бўшаб қурувчилар ишлаётган туннелни босиб қолган.

Президент топшириғига мувофиқ содир бўлган ҳодиса сабаблари ва оқибатларини жойида ўрганиш, зудлик билан бартараф этиш, жабрланганлар ва уларнинг оила аъзоларига ёрдам кўрсатиш мақсадида ҳукумат комиссияси тузилган.

ФВВ томонидан воқеа жойида олиб борилган тезкор қидирув-қутқарув ишлари натижасида олти нафар фуқаронинг жасади тупроқ остидан олиб чиқилиб, уларнинг шахси аниқланган. Қидирув-қутқарув ишлари якунланиб, Комиссия ишининг биринчи фазаси ниҳоясига етди.

Пудратчи-қурувчи ташкилотлар томонидан уларнинг оила-аъзолари ва яқинларига 100 миллион сўмлик дастлабки товон пуллари тўлаб берилган. Шу билан бирга, амалдаги қонунчиликка асосан қўшимча компенсация пуллари тўлаб берилади.

Ҳодиса юзасидан жиноят иши қўзғатилган.