16-dekabr, dushanba kuni Facebook ijtimoiy tarmog‘ida fuqaro Amir Sharifullin Ichki ishlar organi xodimlari tomonidan hech qanday chora ko‘rilmasdan, uning murojaati yuzasidan tekshiruv harakatlari olib borilmayotganligi to‘g‘risida tarqalgan xabar Bosh prokuratura tomonidan o‘rganildi.
Aniqlanishicha, mazkur holat yuzasidan 15-dekabr, yakshanba kuni Mirzo Ulug‘bek tumani IIO FMB 6-son Ichki ishlar bo‘limi Tergov bo‘linmasi tomonidan noma’lum shaxslarga nisbatan Jinoyat kodeksining 277-moddasi 2-qismi “b” bandi (Bir guruh shaxslar tomonidan bezorilik sodir etish) bilan jinoyat ishi qo‘zg‘atilib, dastlabki tergov harakatlari olib borilmoqda.
Jinoyat ishi bo‘yicha jabrlanuvchi Amir Sharifullin o‘z ko‘rsatmasida, 10-dekabr kuni uni yashash uyi oldidan qora rangli Spark avtomashinada noma’lum shaxslar olib ketganligini bildirgan.
Olib borilgan tezkor surishtiruv ishlari natijasida ushbu avtomashinani Toshkent shahrida yashovchi muqaddam Jinoyat kodeksining 104-moddasi (Qasddan badanga og‘ir shikast yetkazish) 3-qismi, 277-moddasi 3-qismi va 105-moddasi (Qasddan badanga o‘rtacha og‘ir shikast yetkazish) 2-qismi bilan sudlangan 28 yoshli S.Q. boshqarib kelganligi aniqlangan.
Mavzuga doir: Toshkent shahar IIBB o‘zining noma’lum shaxslar tomonidan o‘g‘irlanib, kaltaklanganini aytgan fuqaroning murojaatini o‘rganadi
Uning aytishicha, Amir Sharifullin “Lirika” va “Tropikamid” dori vositasini Chilonzor tumanidan olib berishini aytib, ular bilan avtomashinaga o‘tirib, Chilonzor tumani 23-mavzega borishganida Amir Sharifullin psixotrop moddasini o‘z yonidan chiqarib bergan. Shu sababli uning yolg‘on gapirganligiga chiday olmay, yuz qismiga bir-ikki marotaba urgan.
Qayd etilishicha, hozirda ushbu jinoyat ishi bo‘yicha dastlabki tergov harakatlari olib borilayotgan bo‘lib, Toshkent shahar prokuraturasi tomonidan nazoratga olingan.
Izoh (0)