18-dekabr kuni Qoraqalpog‘istonning Taxtako‘pir tumanida qurilish va ta’mirlash ishlari olib borilgan uchta ijtimoiy infratuzilma obyektlarini topshirish marosimi bo‘lib o‘tdi, deb xabar berdi “Gazeta.uz”.
Qurilish va ta’mirlash ishlari BMT Taraqqiyot dasturining “Orolbo‘yi mintaqasi uchun inson xavfsizligi bo‘yicha ko‘psheriklik fondini tashkil etish orqali Orol fojiasidan zarar ko‘rgan aholining turmush sharoiti salohiyatini mustahkamlash” qo‘shma dasturi ko‘magida amalga oshirildi.
Loyiha doirasida “Qoraoy” MFY “Purxon-o‘zak” qishlog‘ida uzunligi 1,5 kilometr bo‘lgan suv quvurlari “Tuyamo‘yin—Nukus—Taxtako‘pir” markaziy magistraliga ulandi. Shu tarzda 250 kishi toza ichimlik suvidan foydalanish imkoniyatini qo‘lga kiritdi.
“Suvsoz”ning tuman bo‘limi rahbari Asilbek Qorabolayev 2018-yildan Taxtako‘pir tumanida to‘rtta “Maqpalkol”, “Daukara”, “Xojamet-ovul” va “Purxon — o‘zak” aholi punktlarida 4000 kishi toza ichimlik suvi bilan ta’minlanganini ma’lum qildi. Ikki suv tozalash inshooti to‘liq rekonstruksiya qilinib, yangi suv quvurlari uzunligi 10 kilometrdan ortiqni tashkil etdi.
Shuningdek, “G‘arazsizlik” MFYda joylashgan 6-umumiy o‘rta ta’lim maktabi majlislar va sport zali to‘liq ta’mirlandi.
“Janadarya” qishloq fuqarolar yig‘inida 11-sonli bolalar bog‘chasining to‘rtta binosidan biri to‘liq ta’mirlandi, bu yerda 60 ga yaqin bola bilim oladi.
Qayd etilishicha, Taxtako‘pir tumanidagi eng chekka qishloqlar aholisi uzluksiz elektr ta’minotiga ega bo‘ldi.
Tumanda 160 va 250 kilovatt quvvatga ega beshta transformator o‘rnatildi.
Umuman olganda, qo‘shma dastur ko‘magida 2017-yildan boshlab Qoraqalpog‘istonning Taxtako‘pir, Mo‘ynoq va Shumanay tumanlarining 33 aholi punktida 21190 dan ortiq qishloq aholisi (49,5 foiz ayollar) turmush darajasini oshirishga qaratilgan 33 ta infratuzilma loyihasi amalga oshirildi.
Izoh (0)