16 декабрь, душанба куни Facebook ижтимоий тармоғида фуқаро Амир Шарифуллин Ички ишлар органи ходимлари томонидан ҳеч қандай чора кўрилмасдан, унинг мурожаати юзасидан текширув ҳаракатлари олиб борилмаётганлиги тўғрисида тарқалган хабар Бош прокуратура томонидан ўрганилди.
Аниқланишича, мазкур ҳолат юзасидан 15 декабрь, якшанба куни Мирзо Улуғбек тумани ИИО ФМБ 6-сон Ички ишлар бўлими Тергов бўлинмаси томонидан номаълум шахсларга нисбатан Жиноят кодексининг 277-моддаси 2-қисми «б» банди (Бир гуруҳ шахслар томонидан безорилик содир этиш) билан жиноят иши қўзғатилиб, дастлабки тергов ҳаракатлари олиб борилмоқда.
Жиноят иши бўйича жабрланувчи Амир Шарифуллин ўз кўрсатмасида, 10 декабрь куни уни яшаш уйи олдидан қора рангли Spark автомашинада номаълум шахслар олиб кетганлигини билдирган.
Олиб борилган тезкор суриштирув ишлари натижасида ушбу автомашинани Тошкент шаҳрида яшовчи муқаддам Жиноят кодексининг 104-моддаси (Қасддан баданга оғир шикаст етказиш) 3-қисми, 277-моддаси 3-қисми ва 105-моддаси (Қасддан баданга ўртача оғир шикаст етказиш) 2-қисми билан судланган 28 ёшли С.Қ. бошқариб келганлиги аниқланган.
Мавзуга доир: Тошкент шаҳар ИИББ ўзининг номаълум шахслар томонидан ўғирланиб, калтакланганини айтган фуқаронинг мурожаатини ўрганади
Унинг айтишича, Амир Шарифуллин «Лирика» ва «Тропикамид» дори воситасини Чилонзор туманидан олиб беришини айтиб, улар билан автомашинага ўтириб, Чилонзор тумани 23-мавзега боришганида Амир Шарифуллин психотроп моддасини ўз ёнидан чиқариб берган. Шу сабабли унинг ёлғон гапирганлигига чидай олмай, юз қисмига бир-икки маротаба урган.
Қайд этилишича, ҳозирда ушбу жиноят иши бўйича дастлабки тергов ҳаракатлари олиб борилаётган бўлиб, Тошкент шаҳар прокуратураси томонидан назоратга олинган.
Изоҳ (0)