AQSh Davlat departamenti Janubiy va Markaziy Osiyo ishlari byurosi o‘zining Twitter’dagi sahifasidaShavkat Mirziyoyevning tuhmat va haqorat uchun ozodlikdan mahrum qilish normasini bekor qilishga qaratilgan topshiriqlarini olqishlab chiqdi. Bu haqda Axborot va ommaviy kommunikatsiyalar agentligi direktori Komil Allamjonov o‘zining Telegram kanali orqali ma’lum qildi.
“Biz O‘zbekistonda tuhmat uchun qamoq jazosi bekor qilinishi rejasini olqishlaymiz. Mamlakat prezidenti aytganidek, matbuot — hukumat faoliyatining ko‘zgusi. Demokratiya erkin OAV talab qiladi. Umid qilamizki, yangi qonun xalqaro me’yorlarga mos ravishda hech qanday qo‘rquvsiz izchil va mustaqil axborot berishni kafolatlaydi”, — deyiladi Janubiy va Markaziy Osiyo ishlari byurosining tvitida.
Eslatib o‘tamiz, Prezident Shavkat Mirziyoyev joriy yilning 22-noyabr kuni qishloqlar va shaharlarda aholini uy-joy bilan ta’minlashning yangi tizimini joriy etish bo‘yicha amalga oshiriladigan chora-tadbirlar muhokamasiga bag‘ishlangan videoselektor yig‘ilishida barcha amaldorlarni OAVni qat’iy hurmat qilish, ular bilan doimiy hamkorlik qilish va kibru havoga berilmaslikka chaqirgandi. Janubiy va Markaziy Osiyo masalalari bo‘yicha AQSh davlat kotibining yordamchisi vazifasini bajaruvchi Alise Uells o‘z sahifasiga O‘zbekiston Prezidentining ushbu so‘zlaridan yanada xursand bo‘lganini yozib qoldirgandi.
Izoh (0)