Toshkent shahridagi tashqi reklama konstruksiyalarining egalari bo‘lgan reklama agentliklariga ularni joriy yilning 26-dekabriga qadar tartibga solish bo‘yicha ko‘rsatma berildi. Bu haqda Toshkent shahar hokimligi xabar qildi.
Ma’lum qilinishicha, 12-dekabr, payshanba kuni Toshkent shahar Qurilish bosh boshqarmasi poytaxtdagi reklama konstruksiyalariga egalik qiluvchi reklama agentliklarida olib borilgan o‘rganish va tahlil natijalariga ko‘ra aniqlangan kamchiliklar haqida ma’lumot bergan.
O‘rganishlar davomida bilbordlarning aksariyatida konstruksiyalarning qaysi jismoniy yoki yuridik shaxsga tegishli ekanligi ko‘rsatilmaganligi aniqlandi. Bundan tashqari, ulardan ko‘pi zanglagan, bo‘yalmagan, reklama bannerlarining rangi o‘chgan yoki yirtilgan bo‘lib, shaharning tashqi ko‘rinishiga salbiy ta’sir qilmoqda.
Reklama agentliklari 26-dekabr kuniga qadar o‘z konstruksiyalarini mulkiy tegishliligi haqidagi ma’lumot (tashkilot nomi va telefon raqami) bilan ta’minlashi shartligi haqida ko‘rsatma berilgan. Bundan tashqari agentliklar o‘z mulklarini ko‘zdan kechirish va qoniqarli texnik holatga keltirishi zarurligi qayd etilgan.
Izoh (0)