АҚШ Давлат департаменти Жанубий ва Марказий Осиё ишлари бюроси ўзининг Twitter’даги саҳифасидаШавкат Мирзиёевнинг туҳмат ва ҳақорат учун озодликдан маҳрум қилиш нормасини бекор қилишга қаратилган топшириқларини олқишлаб чиқди. Бу ҳақда Ахборот ва оммавий коммуникациялар агентлиги директори Комил Алламжонов ўзининг Telegram канали орқали маълум қилди.
«Биз Ўзбекистонда туҳмат учун қамоқ жазоси бекор қилиниши режасини олқишлаймиз. Мамлакат президенти айтганидек, матбуот — ҳукумат фаолиятининг кўзгуси. Демократия эркин ОАВ талаб қилади. Умид қиламизки, янги қонун халқаро меъёрларга мос равишда ҳеч қандай қўрқувсиз изчил ва мустақил ахборот беришни кафолатлайди», — дейилади Жанубий ва Марказий Осиё ишлари бюросининг твитида.
Эслатиб ўтамиз, Президент Шавкат Мирзиёев жорий йилнинг 22 ноябрь куни қишлоқлар ва шаҳарларда аҳолини уй-жой билан таъминлашнинг янги тизимини жорий этиш бўйича амалга ошириладиган чора-тадбирлар муҳокамасига бағишланган видеоселектор йиғилишида барча амалдорларни ОАВни қатъий ҳурмат қилиш, улар билан доимий ҳамкорлик қилиш ва кибру ҳавога берилмасликка чақирганди. Жанубий ва Марказий Осиё масалалари бўйича АҚШ давлат котибининг ёрдамчиси вазифасини бажарувчи Алисе Уэллс ўз саҳифасига Ўзбекистон Президентининг ушбу сўзларидан янада хурсанд бўлганини ёзиб қолдирганди.
Изоҳ (0)