Tadbirkor Saidmahmud Sultonov o‘z mablag‘lari hisobidan 1 milliard 200 million so‘m ajratib, Buvayda tumanidagi 45-umumta’lim maktab hududiga qo‘shimcha 120 o‘ringa ega bo‘lgan zamonaviy o‘quv binosi qurib berdi. Bu haqda Xalq ta’limi vazirligi xabar bermoqda.
O‘zbekiston Konstitutsiyasi qabul qilinganligining 27 yilligi munosabati bilan Buvayda tumanida bo‘lib o‘tgan bayram tadbirida Saidmahmud Sultonovga “Ta’lim homiysi” ko‘krak nishoni tantanali ravishda topshirildi.
Ko‘krak nishoni topshirilish marosimida Farg‘ona viloyati xalq ta’limi boshqarmasi boshlig‘i Ma’rufjon Turdimatov hamda Buvayda tumani hokimi Behzod Ibragimov ishtirok etdi. Tadbirkor Saidmahmud Sultonov Xalq ta’limi vaziri Sherzod Shermatovga bu berilgan e’tibor uchun alohida minnatdorchilik bildirib, kelgusidagi ishlarida ham ta’lim muassasalariga yordam berish va ko‘maklashishini ta’kidlab o‘tdi.
Eslatib o‘tamiz, 2018-yilda Qoraqalpog‘iston Respublikasi Jo‘qorg‘i Kengesi raisi Musa Yerniyazov, 2019-yilda Global Partnership in Education xalqaro tashkilotining O‘zbekistondagi koordinatori Xoa Tran Ringrouz, Surxondaryo viloyati hokimi To‘ra Bobolov hamda “O‘zavtosanoat” va UzAuto Motors kompaniyalari “Ta’lim homiysi” ko‘krak nishoni bilan taqdirlangandi.
Izoh (0)