Respublika o‘rta tibbiyot xodimlari malakasini oshirish markazi faoliyatini takomillashtirish rejalashtirilmoqda

Respublika o‘rta tibbiyot va farmatsevtika xodimlari malakasini oshirish va ixtisoslashtirish markazi hamda uning filiallari faoliyatini takomillashtirish rejalashtirilmoqda. Bu haqdagi Vazirlar Mahkamasining qarori loyihasi muhokama uchun e’lon qilindi

Qaror loyihasiga ko‘ra, Respublika o‘rta tibbiyot va farmatsevtika xodimlari malakasini oshirish va ularni ixtisoslashtirish markazi o‘rta tibbiyot va farmatsevtika kadrlari malakasini oshirish va ularni qayta tayyorlash tizimining tayanch uslubiy markazi hisoblanadi. Markaz o‘z filiallariga uslubiy rahbarlik qiladi, ilmiy-uslubiy asoslarni, o‘quv-uslubiy hujjatlarni ishlab chiqadi.

Shuningdek, markaz o‘zining filiallari bilan birgalikda sog‘liqni saqlashni boshqarish hududiy organlari buyurtmanomalari asosida kontingentning istiqbolli rejasini belgilaydi, kurslarni o‘tkazish rejasini tuzadi, ularni o‘tkazish joyi, malaka oshirish va qayta tayyorlashning turi va shakllarini aniqlaydi, o‘quv rejalari va ta’lim dasturlari mazmuni bo‘yicha tavsiyalar tayyorlaydi.

Hujjatga ko‘ra, markaz Sog‘liqni saqlash vazirligi tizimi tarkibidagi ta’lim muassasasi hisoblanadi.

Qaror loyihasiga asosan, O‘zbekiston Respublikasi Sog‘liqni saqlash vazirligi tasarrufidagi davolash-profilaktika muassasalarida faoliyat yuritayotgan o‘rta tibbiyot va farmatsevtika xodimlari 3—5 yilgacha bola parvarishi ta’tilida bo‘lganda, budjet asosida, 5 yildan ortiq bola parvarishi ta’tilida bo‘lganda esa to‘lov-shartnoma asosida qayta tayyorlashdan o‘tishi belgilanadi.