Тадбиркор Саидмаҳмуд Султонов ўз маблағлари ҳисобидан 1 миллиард 200 миллион сўм ажратиб, Бувайда туманидаги 45-умумтаълим мактаб ҳудудига қўшимча 120 ўринга эга бўлган замонавий ўқув биноси қуриб берди. Бу ҳақда Халқ таълими вазирлиги хабар бермоқда.
Ўзбекистон Конституцияси қабул қилинганлигининг 27 йиллиги муносабати билан Бувайда туманида бўлиб ўтган байрам тадбирида Саидмаҳмуд Султоновга «Таълим ҳомийси» кўкрак нишони тантанали равишда топширилди.
Кўкрак нишони топширилиш маросимида Фарғона вилояти халқ таълими бошқармаси бошлиғи Маъруфжон Турдиматов ҳамда Бувайда тумани ҳокими Беҳзод Ибрагимов иштирок этди. Тадбиркор Саидмаҳмуд Султонов Халқ таълими вазири Шерзод Шерматовга бу берилган эътибор учун алоҳида миннатдорчилик билдириб, келгусидаги ишларида ҳам таълим муассасаларига ёрдам бериш ва кўмаклашишини таъкидлаб ўтди.
Эслатиб ўтамиз, 2018 йилда Қорақалпоғистон Республикаси Жўқорғи Кенгеси раиси Муса Ерниязов, 2019 йилда Global Partnership in Education халқаро ташкилотининг Ўзбекистондаги координатори Хоа Тран Рингроуз, Сурхондарё вилояти ҳокими Тўра Боболов ҳамда «Ўзавтосаноат» ва UzAuto Motors компаниялари «Таълим ҳомийси» кўкрак нишони билан тақдирланганди.
Изоҳ (0)