Gulnora Karimovaning shveysariyalik advokati Greguar Manja o‘z mijozi bilan ko‘rishish vaqtida belgilangan qoidalarni buzganligi sababli O‘zbekistonga kiritilmadi. Bu haqda Bosh prokuratura tomonidan ma’lum qilindi.
Xabar berilishicha, Gulnora Karimovaning manfaatlari himoyasida qatnashayotgan advokatlar xususida ko‘plab so‘rovlar kelib tushmoqda.
Mavzuga doir: Gulnora Karimovaga qarshi yangi jinoyat ishi qo‘zg‘atildi. U o‘lpon yig‘ish va qo‘rqitib, mulklarni tortib olishda ayblanmoqda
Advokatlar bilan barcha munosabatlar Jinoyat-protsessual kodeksi normalari asosida amalga oshirib kelinmoqda hamda ular tomonidan o‘z mijozi huquqlarini himoya qilishda cheklovlar haqida biron-bir shikoyat va iltimosnoma kelib tushmagan.
Bosh prokuraturaning xabar berishicha, amaldagi qonunchilikda chet el advokatlarining O‘zbekiston hududida faoliyat ko‘rsatishi nazarda tutilmagan.
Qayd etilishicha, o‘zini Gulnora Karimovaning advokati sifatida tanishtirib kelayotgan Greguar Manjaning Shveysariya hukumati tomonidan berilgan mandati Gulnora Karimovaga nisbatan Shveysariyada olib borilayotgan jinoyat ishi bilan chegaralangan. Uning O‘zbekistonga kelishi faqatgina Shveysariya hukumatining o‘zaro huquqiy yordam to‘g‘risidagi iltimosnomasi asosida amalga oshirilgan edi.
Bosh prokuraturaga ko‘ra, o‘z mijozi bilan uchrashish uchun yaratib berilgan imkoniyatlarni suiiste’mol qilgan Greguar Manja buzg‘unchilik xarakteridagi harakatlarni amalga oshirgan. Manja O‘zbekistondagi jazoni ijro etish muassasalari haqidagi oldindan yolg‘onligi ma’lum bo‘lgan ma’lumotlarni piar maqsadida tarqatgan va advokatlarning umume’tirof etilgan etika qoidalarini buzgan.
Jazoni ijro etish muassasalari xalqaro huquqni himoyalovchi tashkilotlar uchun ham ochiq bo‘lib, ularning monitoring hisobotlari muntazam ravishda chop etib boriladi, deyiladi idora xabarida.
Bosh prokuraturaning ta’kidlashicha, o‘zbek tarafi mutanosib chora tariqasida Greguar Manjaning O‘zbekiston Respublikasiga kirishiga ruxsat berishni rad etishga majbur bo‘lgan.
Qayd etilishicha, Gulnora Karimovaning Shveysariyadagi jinoyat ishi bo‘yicha boshqa jinoiy sheriklarining xorijiy advokatlari O‘zbekistondagi o‘z mijozlari bilan cheklovlarsiz munosabatni davom ettirmoqda.
Izoh (0)