Toshkentda birinchi modulli “bog‘cha” ochildi

Kecha, 4-dekabr kuni Toshkentning Olmazor tumani maktabgacha ta’lim tashkiloti hududida qurilgan birinchi modulli binoning ochilish marosimi bo‘lib o‘tdi.

Maktabgacha ta’lim vazirligi matbuot xizmatining “Daryo”ga ma’lum qilishicha, ochilish marosimida maktabgacha ta’lim vaziri Agrippina Shin va Xitoyning O‘zbekistondagi elchixonasining muvaqqat ishlar bo‘yicha vakili Janob Chjan Venchuan ishtirok etdi.

Modulli MTT loyiha na’munalarining taqdimoti 2019-yil oktabr oyida bo‘lib o‘tgan edi. Ikki oy muddat ichida loyiha to‘laqonli ishga tushirildi. Birinchi modulli bog‘cha Olmazor tumanining 441-sonli MTTga o‘rnatildi. U bir-biriga ulangan 4 ta dengiz konteyneridan iborat bo‘lib, bolalar uchun qulay mebel jihozlari, ularning aqliy salohiyatini rivojlantiruvchi o‘yinchoqlar va o‘quv materiallari bilan jihozlangan va keng o‘yin maydonchasiga ega.

Modulli maktabgacha ta’lim tashkilotlari loyihasini ishlab chiqish davomida Rossiya, Shvetsiya va Koreyaning ilg‘or tajribalari o‘rganildi. Modulli binolar ekologik toza, sog‘liq uchun xavfsiz materiallardan tayyorlangan va har qanday iqlim sharoitida mo‘tadil haroratni saqlashga imkon beruvchi qo‘shimcha issiqlik izolyatsiyasi bilan jihozlangan.

Shuningdek, mutaxassislar xavfsizlik, tezkor evakuatsiya qilish va bolalar uchun qulay sharoit puxta ishlab chiqqan. Binolar elektr energiyasi, suv ta’minoti, konditsioner, isitish va yong‘indan himoya qilish tizimlari bilan jihozlangan. Qulay va yengil vaznli yig‘ma krovatlar to‘liq kunlik guruhlar uchun taqdim etilgan.

Maktabgacha ta’lim vaziri Agrippina Shinning ta’kidlashicha, modulli maktabgacha ta’lim tashkilotlarning joriy etilishiga bo‘sh o‘rinlarning keskin taqchilligi sabab bo‘lmoqda. Yangi maktabgacha ta’lim tashkilotini barpo qilish uchun ko‘p vaqt talab etgani va budjetdan ajratiladigan mablag‘ sababli bunday MTTlarning soni chegaralangan.

“Modulli bog‘cha inshootlari esa ikki oy ichida tashkil etiladi va ishga tushiriladi, natijada esa 70 foiz xarajat tejaladi. Bu esa joriy budjet hisobiga MTV 70 foizdan ko‘proq bolalarni maktabgacha ta’lim xizmati bilan qamrab olishi mumkin, deganidir. Dastlabki bolalar modul guruhlar tashkil etilayotgan “Qichqiriq” mahallasida MTTga joylashish uchun navbatda turgan 914 nafar kichkintoylar bor. Endilikda esa modulli MTT qurilishi tufayli 120 nafar bola maktabgacha ta’limdan foydalanish imkoniyatiga ega bo‘ladi”, — deydi u.

Modulli binoda 2 ta to‘liq kunlik guruh va 2 smena ishlaydigan qisqa muddatli 1 ta guruh faoliyat yuritadi. Har bir guruhga tarbiyachi pedagog va yordamchi tarbiyachi tayinlanadi.

Modulli MTT bir qator afzalliklarga ega:

• qo‘shimcha konteynerlarni biriktirish evaziga kengaytirish mumkin;
• ixchamligi sababli har qanday infratuzilma bilan moslashadi;
• zarur hollarda demontaj qilinib va boshqa joyga ko‘chirish mumkin;
• qurilishda zamonaviy materiallardan foydalanganligi tufayli qimmat kapital ta’mirlash talab etilmaydi.

Hozirgi kunda Surxondaryo (Sangardak qishlog‘i) va Toshkent viloyatida (Bo‘stonliq tumani) hamda poytaxtning ayrim tumanlari (Olmazor, Shayxontohur, Mirzo Ulug‘bek)da modulli ishlab chiqarish va o‘rnatish ishlari olib borilmoqda.