Qashqadaryo IIB tashabbusi bilan Dehqonobod tumanining Obod qishlog‘idagi 51-maktabda stadion quriladigan bo‘ldi. Bu haqda viloyat IIB rahbariyatining qishloq ahli bilan bo‘lgan muloqotida ma’lum qilindi, deya xabar beradi “Daryo” muxbiri.
Aytilishicha, viloyat IIB rahbariyati tumanning Bozortepa va Obod qishloqlari ahli bilan muloqot o‘tkazgan.
— Gulmurod Bo‘tayorov ism-sharifli o‘qituvchi maktabga stadion va qo‘shimcha bino kerakligini aytib murojaat qildi, — deydi viloyat IIB axborot xizmati rahbari Iroda Rasulova. — Maktabda bolalar uchun stadion bo‘lmagan, 10 va 11-sinflar qayta tashkil etilgani bois qo‘shimcha o‘quv binoga ham ehtiyoj sezilgan. Boshqarma boshlig‘i o‘rinbosari shu yerning o‘zida tuman hokimi o‘rinbosari Sohib Samadov bilan maslahatlashib, 2 oy muddat ichida maktab uchun stadion qurib berilishini aytdi. Stadion qurilishini o‘z nazoratiga olishini ta’kidladi. Maktab uchun qo‘shimcha binoni 2020-yilgi davlat dasturiga kiritish haqida tuman xalq ta’limi bo‘limi rahbariyati bilan kelishildi.
— Stadion uchun davlat mablag‘ ajratib berishini kutib o‘tirmasdan, tuman va viloyat imkoniyatidan kelib chiqib, o‘zimiz harakat qilamiz, — dedi boshqarma boshlig‘i o‘rinbosari Faxriddin Rahmatov. — Greyder va kerakli jihozlarini beramiz, mahalla ahli esa hashar qilib, farzandlari uchun stadion qurilishiga bosh-qosh bo‘ladi. Nasib etsa, ikki oy muddatda bolalar maktab stadionida futbol o‘ynaydigan bo‘ladi.
Murojaatchi Muhriddin Rahimqulovga maktab yonida kutubxona va tikuvchilik sexi ochish uchun imtiyozli kredit ajratiladigan bo‘ldi.
IIB matbuot xizmatining ma’lumot berishicha, IIB rahbariyati va 3-sektorning ishchi guruh a’zolari mutasaddi davlat idoralari rahbarlari ishtirokida 69 nafar fuqaro bilan ko‘rishib, 12 nafar fuqaroning 13 ta masalasini tinglagan. 2 ta muammo joyida hal etilib, 11 tasi mas’ul tashkilotlar ixtiyoriga topshirilgan.
Izoh (0)