Andijonda 3-dekabr kuni yong‘inni o‘chirish vaqtida ikki kishining jasadi topildi, deb xabar bermoqda Davlat yong‘in xavfsizligi xizmati.
Qayd etilishicha, shahardagi “Sanoat” MFY Temir yo‘l ko‘chasidagi uyda yong‘in bo‘lgani to‘g‘risida yong‘in-qutqaruv xizmatiga soat 06:20da xabar kelib tushgan.
Xabar asosida voqea joyiga 2 ta yong‘in o‘chirish bo‘linmasi jalb etilgan. Bo‘linmalar chaqirilgan manzilga 4 daqiqada yetib borgan. Ko‘rilgan tezkor harakatlar natijasida yong‘in soat 06:26 da bartaraf etilgan. Yong‘in oqibatida uyning 1,5 kvadrat metr maydonda pol qismi yongan.
Yong‘inni o‘chirish vaqtida uy egasi 54 yoshli fuqaro Sh.T. va uning 37 yoshli ayol tanishi V.S.ning tutundan dimiqqan holdagi jasadlari topilgan.
Yong‘inga qo‘lbola elektr isitish moslamasidan foydalanish sabab bo‘lgan deb taxmin qilinmoqda. Hozirda voqea yuzasidan tergovga qadar tekshiruv ishlari olib borilmoqda.
Avvalroq Andijon shahridagi ko‘p qavatli uylardan birida qo‘lbola usulda tayyorlangan gazni tortish moslamasida yuzaga kelgan chaqnash oqibatida portlash yuz berib, 8 kishi kasalxonaga yotqizilgani xabar berilgan edi. Voqea joyiga viloyat hokimi Shuhrat Abdurahmonov yetib borgan va zudlik bilan mutasaddi tashkilotlarga yuzaga kelgan zararni qoplash, fuqarolarga ijtimoiy yordam ko‘rsatish yuzasidan topshiriq bergan. Keyinroq IIV huzuridagi Tergov departamenti voqea yuzasidan qo‘shimcha ma’lumot berib, hodisa oqibatida 11 kishi jabrlanganini ma’lum qilgan.
Izoh (0)