Тошкентда биринчи модулли «боғча» очилди

Кеча, 4 декабрь куни Тошкентнинг Олмазор тумани мактабгача таълим ташкилоти ҳудудида қурилган биринчи модулли бинонинг очилиш маросими бўлиб ўтди.

Мактабгача таълим вазирлиги матбуот хизматининг «Дарё»га маълум қилишича, очилиш маросимида мактабгача таълим вазири Агриппина Шин ва Хитойнинг Ўзбекистондаги элчихонасининг муваққат ишлар бўйича вакили Жаноб Чжан Венчуан иштирок этди.

Модулли МТТ лойиҳа наъмуналарининг тақдимоти 2019 йил октябрь ойида бўлиб ўтган эди. Икки ой муддат ичида лойиҳа тўлақонли ишга туширилди. Биринчи модулли боғча Олмазор туманининг 441-сонли МТТга ўрнатилди. У бир-бирига уланган 4 та денгиз контейнеридан иборат бўлиб, болалар учун қулай мебель жиҳозлари, уларнинг ақлий салоҳиятини ривожлантирувчи ўйинчоқлар ва ўқув материаллари билан жиҳозланган ва кенг ўйин майдончасига эга.

Модулли мактабгача таълим ташкилотлари лойиҳасини ишлаб чиқиш давомида Россия, Швеция ва Кореянинг илғор тажрибалари ўрганилди. Модулли бинолар экологик тоза, соғлиқ учун хавфсиз материаллардан тайёрланган ва ҳар қандай иқлим шароитида мўътадил ҳароратни сақлашга имкон берувчи қўшимча иссиқлик изоляцияси билан жиҳозланган.

Шунингдек, мутахассислар хавфсизлик, тезкор эвакуация қилиш ва болалар учун қулай шароит пухта ишлаб чиққан. Бинолар электр энергияси, сув таъминоти, кондиционер, иситиш ва ёнғиндан ҳимоя қилиш тизимлари билан жиҳозланган. Қулай ва енгил вазнли йиғма кроватлар тўлиқ кунлик гуруҳлар учун тақдим этилган.

Мактабгача таълим вазири Агриппина Шиннинг таъкидлашича, модулли мактабгача таълим ташкилотларнинг жорий этилишига бўш ўринларнинг кескин тақчиллиги сабаб бўлмоқда. Янги мактабгача таълим ташкилотини барпо қилиш учун кўп вақт талаб этгани ва бюджетдан ажратиладиган маблағ сабабли бундай МТТларнинг сони чегараланган.

«Модулли боғча иншоотлари эса икки ой ичида ташкил этилади ва ишга туширилади, натижада эса 70 фоиз харажат тежалади. Бу эса жорий бюджет ҳисобига МТВ 70 фоиздан кўпроқ болаларни мактабгача таълим хизмати билан қамраб олиши мумкин, деганидир. Дастлабки болалар модул гуруҳлар ташкил этилаётган «Қичқириқ» маҳалласида МТТга жойлашиш учун навбатда турган 914 нафар кичкинтойлар бор. Эндиликда эса модулли МТТ қурилиши туфайли 120 нафар бола мактабгача таълимдан фойдаланиш имкониятига эга бўлади», — дейди у.

Модулли бинода 2 та тўлиқ кунлик гуруҳ ва 2 смена ишлайдиган қисқа муддатли 1 та гуруҳ фаолият юритади. Ҳар бир гуруҳга тарбиячи педагог ва ёрдамчи тарбиячи тайинланади.

Модулли МТТ бир қатор афзалликларга эга:

• қўшимча контейнерларни бириктириш эвазига кенгайтириш мумкин;
• ихчамлиги сабабли ҳар қандай инфратузилма билан мослашади;
• зарур ҳолларда демонтаж қилиниб ва бошқа жойга кўчириш мумкин;
• қурилишда замонавий материаллардан фойдаланганлиги туфайли қиммат капитал таъмирлаш талаб этилмайди.

Ҳозирги кунда Сурхондарё (Сангардак қишлоғи) ва Тошкент вилоятида (Бўстонлиқ тумани) ҳамда пойтахтнинг айрим туманлари (Олмазор, Шайхонтоҳур, Мирзо Улуғбек)да модулли ишлаб чиқариш ва ўрнатиш ишлари олиб борилмоқда.