4-dekabr kuni Namangan shahrida IIB xodimlarining jangovar salohiyatini oshirish va jismoniya tayyorgarligini sinovdan o‘tkazish maqsadida maxsus taktik mashg‘ulotlar o‘tkazildi. Bu haqda Namangan IIB axborot xizmati xabar bergan.
Mashq davomida shartli ravishda inkassatsiya xodimlariga hujum uyushtirib ular ketayotgan avtomobildan 500 million so‘m pulni o‘g‘irlab Nexia’da jinoyat joyidan qochib ketgan qurollangan xavfli jinoyatchilar “Qal’a”, “To‘sib ushlash” va “Sirena” maxsus tezkor rejalarini amalga oshirish orqali bir nafar fuqaroni garovga olgan vaqtida maxsus guruh tomonidan qo‘lga olingan.
O‘quv mashg‘ulotlarida Namangan viloyati IIB, DXX, Bojxona boshqarmasi, FVB, Milliy gvardiya 82923-sonli bo‘limi, Prokuratura va tezkor guruh a’zolari voqea joyiga yetib kelgan va mashq rejasi bo‘yicha obyekt oldida tezkor shtab, jangovar boshqaruv markazi, tezkor guruhlar, aloqa, ta’minot va razvedka guruhlari tashkil etilgan.
Mashq yakunlangach Ichki ishlar vaziri o‘rinbosari D.Qodirov rahbarligida xodimlarning harakatlari muhokama qilindi. Maxsus taktik mashq davomida tegishli xizmatlar va tuzilmalarning kuch va vositalari bilan tezkor boshqaruvni amalga oshirish, obyektlarda qo‘poruvchi harakatlarini sodir etilishiga qaratilgan urinishlarga chek qo‘yish, garovga olingan fuqarolarni ozod qilish, ularni evakuatsiya qilish, portlovchi vositalarni zararsizlantirish, jamoat tartibini saqlash, yong‘in, yo‘l harakati va fuqarolar xavfsizligini ta’minlash, huquqbuzarliklarni oldini olish, avariya-qutqaruv ishlarini olib borish kabi ishlar sinovdan o‘tkazilgan, deyiladi Namangan IIB Axborot xizmati bergan xabarda.
Izoh (0)