Gaz quvurlarining demontaj qilinishi oqibatida Toshkentning ayrim tumanlarida gaz taqchilligi kuzatildi. Bu haqda “O‘ztransgaz” kompaniyasi matbuot xizmati ma’lum qildi.
“Darhaqiqat, Rohat mavzesi tomondan Qo‘yliq bozorigacha bo‘lgan Toshkent halqa yo‘li bo‘ylab yer usti metro qurilishi vaqtida, zarurat tufayli, 1,5 kilometr uzunlikdagi gaz quvuri demontaj qilindi. Shu sababli sovuq kunlarda shaharning ayrim hududlarida tabiiy gaz taqchilligi kuzatildi”, — deyiladi kompaniya axborotida.
Bugungi kunda gaz quvurini, uni yo‘lning narigi tarafiga o‘tkazish orqali, qayta tiklash ishlari olib borilmoqda. Hozirgacha diametri 700 mm bo‘lgan 800 metr quvur yotqizib bo‘lingan. Qurilishga 35 dan ortiq mutaxassis va 14 ta maxsus texnika jalb etilgan. Qurilish ishlari tunu-kun olib borilayotganini ma’lum qilgan “O‘ztransgaz” “vaqtinchalik noqulaylik uchun” uzr so‘ragan.
“Gazeta.uz”ning qo‘shimcha qilishicha, gaz quvuri aynan qachon demontaj qilingani va uni qayta tiklash ishlari aynan qachon yakunlanishi haqida aniq ma’lumot olib bo‘lmagan.
Bundan tashqari, 29-noyabr kuni Facebook’dagi “TChSJ i kak s nim jit?” guruhida Toshkentdagi Mahtumquli ko‘chasi va Ohangaron yo‘li kesishmasidagi uch qavatli ostin-ustun yo‘l qurilishi davomida magistral gaz quvurining bir qismi demontaj qilingani haqida anonim xabar qoldirilgan edi.
“Barcha sa’y-harakatlarga qaramay, issiqlik tarmoqlarini qayta yotqizib chiqish ishlari kutilgan samarani bermadi va ilk qahratondayoq shahar muzlab qoldi. Ne baxtki, iliq kunlar kutilmoqda. Shahar bo‘ylab gaz bosimining pasayib ketgani issiqlik ta’minoti korxonalariga haroratni hech bo‘lmasa normativ ko‘rsatkichga yetkazish imkonini bermadi. Oqibatda shahar muzlamoqda, hamma norozi. Nega bunday bo‘ldi? Sabab, ta’kidlanganidek, issiqlik manbalariga yetkazib berilayotgan gaz bosimining pastligida. Ma’lum bo‘lishicha, uch qavatli ko‘prikni qurish vaqtida diametri 700 mm bo‘lgan va shaharni gaz bilan ta’minlab turgan ikki asosiy arteriyadan biri hisoblangan magistral gaz quvurining bir qismi demontaj qilingan. Nima uchun bu gaz quvurini sovuq kunlar boshlanguniga qadar qayta tiklash imkoni bo‘lmagan? Sergeli 8-issiqlik markazi, Chilonzor 5-issiqlik markazi, Mirobod 6-issiqlik markazi va Sergeliga gaz yetmay qolishi hech qachon kuzatilmagan edi. Umid qilamanki, ‘O‘ztransgaz’ gaz quvurini tezda qayta tiklanishi uchun zarur choralarni ko‘radi”, — deb yozilgandi xabarda.“Gazeta.uz”ning xabar berishicha, vaziyatdan boxabar manbalar bu xabarda yozilgan ma’lumotlarni tasdiqlagan.
Ma’lumotlarga ko‘ra, 22-noyabrdan boshlab Toshkentning janubi-g‘arbiy qismi — Mirobod, Chilonzor, Sergeli, Shayxontohur, Yakkasaroy va Uchtepa tumanlarida gaz bosimi pasayib ketgan.
Izoh (0)