Kurdlar Suriyaning hududiy yaxlitligi tarafdori ekanligini bildirdi

Kurdlar Suriyadagi vaziyatni siyosiy yo‘l bilan hal etish va mamlakatning hududiy yaxlitligini ta’minlash tarafdori ekanligini ma’lum qildi. Bu haqda “Suriya demokratik kuchlari” kurd koalitsion guruhi qo‘mondoni Mazlum Abdi Al Hadath telekanaliga bergan intervyusida ma’lum qilgan, deb yozmoqda “TASS”.

“Biz Suriyaning hududiy yaxlitligini ta’minlash, shuningdek, mamlakat shimolida sakkiz yildan beri amalga oshirilayotgan kurdlar avtonom hukumati loyihasi doirasida o‘z huquqlarimizning tan olinishiga erishish tarafdorimiz”, – deydi kurdlar qo‘mondoni.

Abdi kurdlarning Rossiya bilan hamkorlikda Suriya hukumati bilan muzokaralarni davom ettirishini ham ma’lum qilgan.

“Muzokaralar davom etmoqda, lekin Damashq va kurdlar o‘rtasidagi nizolarga hali ham barham berilgani yo‘q. O‘zaro yaqinlashuv pozitsiyasiga juda yaqin turibmiz”, – deydi Mahdi Abdi.

“Suriya demokratik kuchlari” qo‘mondoni kurd jangari guruhlarining keyinchalik Suriya hukumati armiyasi tarkibiga kirishi ehtimoli borligini bildirdi.

“Ushbu hodisa hukumat bilan siyosiya kelishuv amalga oshsagina sodir bo‘lishi mumkin. Biz ungacha qo‘limizda qurol bilan har narsaga tayyor holda kurashni davom ettiraveramiz”, - deydi Abdi.

Kurdlar masalasi2011-yilda Suriyada inqiroz boshlangach, kurdlar mamlakatning uchta viloyati Qamishli, Kobani va Afrinida o‘z avtonom boshqaruv organlariga asos soldi. 2017-yilda “Suriya demokratik kuchlari” otryadlari IShID tashkiloti ixtiyoridagi Xaseke va Raqqa viloyatlarini terrorchilardan tozaladi, Dayr-Az-Zor viloyatidagi neft konlarini ham IShID vakillaridan tortib oldi. AQSh koalitsiyasi homiylik qilayotgan kurd jangarilari Suriya hududining 27 foiziga egalik qila boshladi.

Turk qo‘shinlari “Suriya demokratik kuchlari”ning asosiy bo‘g‘ini hisoblanuvchi “Xalq o‘z-o‘zini himoyalash kuchlari” kurd jangarilariga qarshi uchta harbiy operatsiya o‘tkazgan. Operatsiya oqibatida Aleppoda Afrin hududi qurshab olingan va Suriya shimoli-sharqida qochoqlar uchun xavfsiz zona tashkil qilinmoqda.

22-oktabrda Rossiya prezidenti Vladimir Putin hamda Turkiya davlat rahbari Rajab Toyyib Erdo‘g‘on Sochida Suriya shimolidagi beqaror vaziyatni o‘nglashga qaratilgan xalqaro memorandum imzoladi. Ushbu hujjatga ko‘ra kurdlar Turkiya tashkil qilayotgan 30 kilometrlik xavfsiz zona hududini tark etgan va rus harbiy politsiyasi va turk qo‘shinlari 12 ta qo‘shma patrul tadbiri o‘tkazgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.