Курдлар Суриянинг ҳудудий яхлитлиги тарафдори эканлигини билдирди

Курдлар Суриядаги вазиятни сиёсий йўл билан ҳал этиш ва мамлакатнинг ҳудудий яхлитлигини таъминлаш тарафдори эканлигини маълум қилди. Бу ҳақда «Сурия демократик кучлари» курд коалицион гуруҳи қўмондони Мазлум Абди Al Hadath телеканалига берган интервьюсида маълум қилган, деб ёзмоқда «ТАСС».

«Биз Суриянинг ҳудудий яхлитлигини таъминлаш, шунингдек, мамлакат шимолида саккиз йилдан бери амалга оширилаётган курдлар автоном ҳукумати лойиҳаси доирасида ўз ҳуқуқларимизнинг тан олинишига эришиш тарафдоримиз», – дейди курдлар қўмондони.

Абди курдларнинг Россия билан ҳамкорликда Сурия ҳукумати билан музокараларни давом эттиришини ҳам маълум қилган.

«Музокаралар давом этмоқда, лекин Дамашқ ва курдлар ўртасидаги низоларга ҳали ҳам барҳам берилгани йўқ. Ўзаро яқинлашув позициясига жуда яқин турибмиз», – дейди Маҳди Абди.

«Сурия демократик кучлари» қўмондони курд жангари гуруҳларининг кейинчалик Сурия ҳукумати армияси таркибига кириши эҳтимоли борлигини билдирди.

«Ушбу ҳодиса ҳукумат билан сиёсия келишув амалга ошсагина содир бўлиши мумкин. Биз унгача қўлимизда қурол билан ҳар нарсага тайёр ҳолда курашни давом эттираверамиз», - дейди Абди.

Курдлар масаласи2011 йилда Сурияда инқироз бошлангач, курдлар мамлакатнинг учта вилояти Қамишли, Кобани ва Афринида ўз автоном бошқарув органларига асос солди. 2017 йилда «Сурия демократик кучлари» отрядлари ИШИД ташкилоти ихтиёридаги Хасеке ва Раққа вилоятларини террорчилардан тозалади, Дайр-Аз-Зор вилоятидаги нефть конларини ҳам ИШИД вакилларидан тортиб олди. АҚШ коалицияси ҳомийлик қилаётган курд жангарилари Сурия ҳудудининг 27 фоизига эгалик қила бошлади.

Турк қўшинлари «Сурия демократик кучлари»нинг асосий бўғини ҳисобланувчи «Халқ ўз-ўзини ҳимоялаш кучлари» курд жангариларига қарши учта ҳарбий операция ўтказган. Операция оқибатида Алеппода Африн ҳудуди қуршаб олинган ва Сурия шимоли-шарқида қочоқлар учун хавфсиз зона ташкил қилинмоқда.

22 октябрда Россия президенти Владимир Путин ҳамда Туркия давлат раҳбари Ражаб Тоййиб Эрдўғон Сочида Сурия шимолидаги беқарор вазиятни ўнглашга қаратилган халқаро меморандум имзолади. Ушбу ҳужжатга кўра курдлар Туркия ташкил қилаётган 30 километрлик хавфсиз зона ҳудудини тарк этган ва рус ҳарбий полицияси ва турк қўшинлари 12 та қўшма патрул тадбири ўтказган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.