Iroq shimolida joylashgan Kirkuk viloyatida turli hududlarda ro‘y bergan uchta portlash oqibatida halok bo‘lganlar soni 16 nafarga yetdi. Bu haqda “Al-Jazira” telekanali tibbiyot xodimlari ma’lumotiga asoslanib xabar berdi, deb yozmoqda “RIA Novosti”.
Kirkukning uchta joyida portlashlar yuz bergan, ushbu hodisalar oqibatida 11 nafar odam, jumladan harbiylar turli darajada tan jarohatlari olgan.
Iroqdagi hukumatga qarshi namoyishlar 1-oktabrda boshlangan. 2-oktabrda Iroq hududining 75 foiz qismida internet o‘chirib qo‘yilgan va 11-oktabrda qayta ishga tushirilgandi. Iroqdagi namoyishlarning birinchi bosqichida kuchishlatar tizim hamda xalq o‘rtasidagi to‘qnashuvlar natijasida 157 nafar odam: 149 nafar fuqaro va 8 nafar xavfsizlik xizmati xodimlari halok bo‘lgan, qariyb 3,5 ming odam turli darajadagi tan jarohatlari olgan.Ma’lum vaqt tanaffusdan so‘ng yana qayta boshlangan noroziliklarda politsiya hamda xalq o‘rtasida kuchli to‘qnashuvlar kuzatilmoqda. Namoyishchilar viloyatlardagi siyosiy partiyalar ofislari, mahalliy hokimliklar va diplomatik vakolatxonalar binolarini yoqishga uringani va ularning ayrimlariga o‘t qo‘ygani, Iroqdagi namoyishlarda halok bo‘lganlar soni 250 nafardan oshgani xabar qilingan. Al-Sumaria telekanali ma’lumotiga ko‘ra internetni o‘chirib qo‘yish Iroq hukumatiga 1 milliard AQSh dollariga tushgan. Politsiya hamda aholi vakillari o‘rtasidagi to‘qnashuvlarda yuzlab odamlar halok bo‘lgan.
Izoh (0)