Ўзбекистондаги нефть ва газ давлат концерни «Ўзбекнефтгаз» АЖда тизимли ўзгаришларнинг биринчи босқичи якунланди, деб хабар бермоқда компания матбуот хизмати.
Янгиланган «Ўзбекнефтгаз» учта асосий йўналишда фаолият юритувчи жамиятларга бўлинди. Энди фақат нефть ва газ қазиб олиш ва ишлаб чиқариш билан шуғулланади.
«Ўзбурғунефтгаз», «Ўзнефтқазибчиқариш», «Ўзнефтмаҳсулот», «Ўзнефтгазмаш»лар «Ўзбекнефтгаз» акциядорлик жамияти таркибига киритилди.
«Ўзтрансгаз» «Ўзбекнефтгаз» таркибидан чиқарилди ва табиий газни сотиш, сотиб олиш ҳамда етказиб бериш бўйича мамлакатдаги ягона оператор этиб тайинланди. «Ўзбекнефтгаз»нинг «Ўзтрансгаз»даги улушлари давлат активларини бошқариш агентлигига берилди.
Шунингдек, «Ўзтрансгаз»нинг ҳудудий филиаллари негизида «Ҳудудгазтаъминот» АЖ ташкил қилинди ва давлат активларини бошқариш агентлиги унинг акциядори этиб белгиланди.
Мавзуга доир: «Ўзбекнефтгаз»нинг устав капиталларидаги улушлари Давлат активларини бошқариш агентлигига ўтказилди
Шунингдек, қарорда «Ўзбекнефтгаз»нинг асосий фаолияти доирасига кирмайдиган бир қатор мол-мулклари компания тасарруфидан чиқарилиши кўзда тутилган ҳамда компания иккинчи даражали фаолият турлари билан шуғулланмаслиги белгиланган.
Жумладан, «Ўзнефтмаҳсулот» АЖ таркибидаги 1 381 та АЁҚШ аукцион орқали хусусийлаштирилиши; «Ўзбекнефтгаз» таркибига кирувчи ташкилотларнинг бозорлар, савдо ва чорвачилик комплекслари маҳаллий ҳокимият органларига берилиши қарор қилинган эди.
Изоҳ (0)