Joriy yilning o‘tgan davri mobaynida Mirishkor tumanidagi haydovchilarning 321 nafari belgilangan tezlikka rioya qilmagan bo‘lsa, 68 nafari mast holda mashina boshqargan. Bu haqda tuman Yo‘l harakati havfsizligi guruhi tomonidan tashkil etilgan davra suhbatida ma’lum qilindi.
Ta’kidlanishicha, joriy yilning o‘tgan davri mobaynida tumanda haydovchilar tomonidan 6667 ta qoidabuzarlik qayd etilgan bo‘lib, qoidabuzarliklar evaziga 921 million 163 ming so‘mlik jarima undirilgan. 87 million 450 ming so‘mlik jarimalarni undirish uchun sudga murojaat qilingan.
— 6667 ta qoidabuzarlikning 321 tasi belgilangan tezlikka rioya qilmaslik bo‘lsa, 74 nafar haydovchining rulda telefondan foydalangani aniqlangan, — deydi Mirishkor tuman IIB Yo‘l harakati xavfsizligi guruhi rahbari, kapitan Oybek Shomurodov. – 79 ta holatda esa haydovchilar qizil chiroqda harakatlangan. 9 nafar haydovchi hayotini xavf ostiga qo‘yib qarama-qarshi yo‘nalishda mashina boshqargan bo‘lsa, 68 nafar haydovchi o‘zgalar hayotini ham xavf ostiga qo‘yib mast holda mashina boshqargan.
Tadbirda so‘z olgan mahalla raislari ayni kunda “Jeynov” chorrahasidagi svetafor bir vaqtning o‘zida 2 xil rangda yonishi-yu haydovchilarning mahallalar orasidagi yo‘laklardan katta tezlikda harakatlanishidan nolidi. Va tuman Yo‘l harakati xavfsizligi guruhi inspektorlaridan yordam so‘radi.
— Jeynov chorrahasidagi svetafor bir vaqtning o‘zida ikki xil rangda yonadi, — deydi tadbir ishtirokchilaridan biri. – Ancha paytdan beri shunday nosoz holatda ishlayapti. Hech kim bunga e’tibor qaratmayapti.
Maktab direktorlarining aytishicha, ta’lim muassaslari yonida noqonuniy “stoyanka”lar ham paydo bo‘la boshlagan.
— Maktabimizning chiqish darvozasi oldida noqonuniy “stoyanka” paydo bo‘lgan, — deydi 21-maktab direktori. – Ushbu masalaning ijobiy yechim topishi uchun tuman IIB va Yo‘l harakati xavfsizligi xodimlaridan yordam kutib qolardim.
Tadbirda ta’kidlanishicha, Mirishkorda joriy yilning o‘tgan davri mobaynida 8 ta YTH sodir etilgan bo‘lib, unda 2 nafar fuqaro vafot etgan.
Izoh (0)