“Daryo”da qashqadaryolik 54 yoshli ayol fuqarolik pasportida erkak bo‘lib qolgani bois nafaqaga chiqolmay sarson bo‘layotgani haqida yozilgandi. Qamashi tuman hokimligi axborot xizmati mazkur xabarga munosabat bildirdi.
Hokimlik axborot xizmatining yozishicha, ushbu holatga aniqlik kiritish maqsadida Qamashi tuman IIB Migratsiya va fuqarolikni rasmiylashtirish bo‘limi boshlig‘i, mayor Choriyor Mahmudov bilan suhbatlashilgan.
— Darhaqiqat, Bibixol Eshmirzayevaning fuqarolik pasportidagi jinsi ko‘rsatiladigan joyga “erkak” deb ko‘rsatib ketilgan, — deydi Choriyor Mahmudov. — 2015-yilda fuqaroga pasport berilishi vaqtida e’tiborsizlik sabab kompyuter bazasiga “erkak” deb kiritilgan. Ushbu holat yuzasidan murojaat qilinganda fuqarolik pasportiga jinsi ko‘rsatiladigan joyga “ayol” deb kiritib berilgan. Biroq bazada “erkak” bo‘lib qolavergan. Pensiyaga chiqish vaqtida fuqaro pensiya ta’minotiga borib, bazada ushbu pasport egasi “erkak” bo‘lib turganini bilgan. 2019-yilning 23-oktabrida fuqarolik pasportini qayta olish uchun murojaat qilgan Bibixol Eshmirzayevaga 2019-yilning 27-noyabr kuni fuqarolik pasporti berildi.
Ushbu holat yuzasidan e’tiborsizlik qilgan xodimga xizmat tekshiruvi tayinlandi.
Qamashi tuman pensiya jamg‘armasi tuman bo‘limi mutaxassisi ushbu holatga quyidagicha izoh beradi.
— Fuqaro Bibixol Eshmirzayeva bizga pensiyaga chiqish bo‘yicha murojaat qilgandi. Fuqarolik pasporti bo‘yicha ma’lumotlarni bazaga kiritish vaqtida jinsi “erkak” bo‘lib chiqdi. Yurtimizda erkaklar uchun pensiyaga chiqish yoshi 60 yosh qilib belgilangan. Bazada erkak bo‘lib kirtilgan fuqaro 60 yoshdan pensiyaga chiqishi lozim. Fuqarolik pasportidagi ma’lumotlar o‘zgartirib berilsa, belgilangan tartibda pensiyaga chiqariladi.
— Xato hammada ham uchraydi. Biroq ushbu xatolarni vaqtida to‘g‘irlash lozimligini unutmasligimiz shart, — deyiladi tuman hokimligi axborot xizmati xabarnomasida.
Izoh (0)